Nongpoh, 3 Naitung: Ka jingiamih jong ki paidbah na ka daw jong ka jingsniew ka surok ka la nangiai long na kawei ka sngi sha kawei pat, ki la don ki jingiakhih kiba la mih ruh haki lad pathai khubor jong ka jylla dang ha kine ki khyndiat taiew bad khyndiat sngi kiba lah dep, kaba long ruh ryngkat ka jingpynrem iaki bor sorkar da kaba kynnoh ba ka sorkar kam shem la pynbha iaki surok. Hynrei ha kane ka sngi kaba mynta pat kawei ka shnong kaba don ha Ri Bhoi District ka shnong kaba don ha syndah jong ka Office treikam u Block Development Officer ka Umling C&RD Block ha Ri Bhoi District, kane ka dei ka Shnong Umsarang. Ka jngai tang khyndiat eh kumba 1km tam eiei na ka surok bha National Highway 6 bad tang kumba 700m eiei na kawei ka surok PWD kaba leit sha ka shnong Umling Lambrang kaba lah don ka surok rong.
Ka jingiamih jong ki paidbah na kane ka shnong kam dei ka jingiakhih lane ka jingpynrem iaka sorkar hynrei ka dei ka jingiamaramot hi iaka surok namar lah bun bunsien ba ki la ioh iaki jingkular ban shna iaka surok na ki nongialam ka Constituency hynrei ka la shu kut noh tang haka jingiakular na kawei ka elekshon sha kawei pat. U Rangbah Shnong kane ka Shnong Umsarang u Bah Throlin Thangkhiew haba kren u la iathuh ba ka la don ruh ka jingleit buh iaka jingkyrpad hakhmat u Nongmihkhmat ka Constituency Nongpoh hynrei kam shem la don ki dak ki shin ba ka shnong kan ioh ia kane ka surok shnong kaba ki paidbah ki la ju mat iaki jingeh haka kit ka bah, ka leit ka wan bad khamtam haka kit nongpang ban pynpoi sha ki jaka ai jingsumar, u Bah Dros Lyngdoh uba dei u Adviser jong ka Dorbar Shnong Umsarang u la ong ba ki la don shibun ki jingjia kiba sngewsih na ka daw jong ka jingsniew jong kane ka surok kaba kynthup kum ka jingbymlah jong ki kali ambulance ban wan sha kane ka shnong, ka jingkylla jong ki kali jong ki nongshongshnong haba ki kit iaki marrep jong ki ban pynpoi sha ki iew ki hat, ka jingjynjar jong ki khynnah skul ban iaid khamtam haka por lyiur kaba kim nang ban phong juti namar ka jingktieh palat ka surok bad kiwei kiwei ki jingeh kiba la pynduh noh iaka jingbit jingbiang jong ka shnong bad kaba la khanglad iaka roi ka par jong ki nongshongshnong.
Ki paidbah shnong ha kane ka sngi watla u slap um ailad ban trei haka rukom kaba dei hynrei ki la iamih paidbah ban maramot hi ia kane ka surok khlem da ap shuh ia kata ka jingkular kaba ki ioh na ki nongmihkhmat paidbah bad na ka sorkar namar ka jingdonkam ka la long kaba haduh katta katta bad kaba hakhmat eh. Hynrei kim shem la lah ban maramot da ki tiar kiba long skhem bad neh slem hynrei ki la maramot tang na rong kaba la bret da ka NHAI haba ki pynbha iaka surok bah kaba lah ban ong ba haka shnong Umsarang la shna iaka surok da kaba mar kaba la bret da ka NHAI.
Ki nongialam shnong ka Shnong Umsarang ki la pynpaw iaka jingsngewnguh iaki laingut ki nongialam jong ki Sengbhalang kiba la ju don ryngkat na ka por sha ka por bad kiba la noh synniang sha kane ka shnong jan man la ka por ba ki nongshongshnong ki pynsngew iaki jingeh, u Bah Markus Marten uba dei u President ka HNYF Northern Region, u Bah Luistar Lyngdoh uba dei u President ka FKJGP North Khasi Hills District bad ia u Bah Banroi Wahlang uba dei u President ka FKJGP na Umling Unit.