Nongpoh 3 Nailar 2024: Ban nang pynsngewthuh shuh shuh iaki paidbah Nongshongshnong halor ka jingbha bad ka jingbymbha nalor kaei kaba ki ju ioh iaki jinghikai na la ing la sem bad kumjuh ruh na ki skul, ka Sengbhalang Ri Bhoi People’s Council Umling Circle haka jingiatreilang bad ka Chief Minister Youth Centre Umling lane ka CMYC kaba don ha Umling, haka 3 tarik u nailur 2024 ka la pynlong iaka Awareness halor ki katto katne ki mat kiba ktah bha iaka imlang ka sahlang, hadien ba kiba bun ki jingjia ba sngewsih ki ju mih na ka por sha ka por kum ka jingshongkha khynnah, ka jingarmet haka por bym pat dei por, ka jingkyrni haki jingdih ba pynbuaid, ka jingngop haki kam sniew lyngba ka jingdon ka internet, ka jingleh beijot iaki khyllung khynnah, ki kyndon ain haba bishar iaki khynnah rit kiba la kum ngop haki kam sniew, ka jingpep skul khlem dei por bad kiwei kiwei.
Ha katei ka sngi la wan ban don ryngkat naduh u Bah Jayson Lenox Nongrum President Rangbah RBPC Sengkmie, ka Kong Darihun Sohtun District Out Of School Coordinator Ri Bhoi District, ka Kong G Warjri District Health Education Officer Ri Bhoi District, u Bah Teibor Kyndiah District Child Protection Officer, u Bah Comenson Wahlang Rangbah Shnong Umling, u Bah Augustine Wahlang uwei na ki Riew Rangbah ba paw jong ka thaiñ, u Bah Deibormi Sariang Innovation Fellow CMYC Umling, ki nonghikai, ki khynnah skul na katei ka shnong ki longkmie longkpa lem bad kiwei kiwei.
Haba ai jingkren na ka liang ki nongkren ki la pynpaw ba kum kane ka jingialumlang bad iakynduh hapdeng ki Officer District kiba don iaka bynta ban long ki Nongiarap haba don ki lanot kiba ngat ha kino kino ki kam sniew, ryngkat ki paidbah shnong ka long kaba donkam eh haduh katta katta namar ki jingsniew ki lah nangjyllei kat nangmih ki sngi namar ka jingstad jong ki briew ban pyndonkam iaki kor internet ka ialam tengteng haki jingngop pat haki kam basniew kiba ktah pat iaka imlang ka sahlang.
Shuh shuh ban pynphuh pynphing ha Katei ka program la ioh ruh iaka jingrwai na Ki samla ka shnong Umling bad ka jingshad na ki khynnah training jong ka CMYC Umling
