Nongpoh 20 Jymmang: Ka jingnangnud jong ki nongialam Sengbhalang ban iada ia la ka jylla na ka jingwanrung beain lane ka jingwanrung kyrthep jong ki briew kiba nabar kam shem pat la daitthah haka mynsiem ki samla ha kaba lah ban ong ba ki briew kiba nabar ki wan ha kiba bun rukom bad lah ban kdew katto katne ba kine ki briew kiba nabar ki wan da kaba pyrshang ban wan trei wan ktah lane leh iaki kam khaii lane kino kino ki kam, khlem ki kot ki sla lane ka jingshim jingbit na ki bor sorkar ban wanrung sha kiwei pat ki jylla na ka bynta ki kam jong ki.
Ha kane ka sngi kaba mynta kata haka 20 tarik u Jymmang 2024, ki dkhot jong ka Seng Confederation of Ri Bhoi People namar ka jingsngewkhia halor ka jingnang jyllei ki bar jylla kiba wan trei wan ktah hapoh ka jylla ha kut ki jaka trei bad kaba la pynlyngngoh iaki dkhot ka Seng ka long ba haba ki pyrshang ban leit jurip ia ki bar jylla haki jaka trei jong ki bar jylla kim shem la don iaki kot ki sla, bad ka la pynlong iaki nongialam ka Seng ban leit mih syndon ha Anti Infiltration Check Gate kaba don ha Byrnihat Ri Bhoi District ban wad jingtip na ki bor pulit kiba don iaka kam ban peit iaka jingwanrung jong ki briew kiba nabar hapoh ka jylla Meghalaya. Haba ki dkhot jong ka Seng ki la ienglang hangtei ban peit iaka rung ka mih jong ki briew kiba nabar kiba wan lyngba kane ka surok bah, bad bunbun ngut la iohbat iaki briew kiba nabar ki bym don iaki kot ki sla katkum ka kam kaba ki wan, ia kitei ki briew la pynphai noh khlem don jingiakren da ki bor pulit ka Anti Infiltration Check Gate.
Kane ka jingpyrshang jong ki kynhun Sengbhalang ban leit ha kane ka jaka ba la buh da ka sorkar na ka bynta ban peitthuh iaka jingwanrung ki briew kiba nabar ka la long da ki bun bunsien bad kiba bun ki Sengbhalang ki ju pynpaw iaka jingsngewkhia halor ka jingdon jong ki briew kiba nabar kiba la iohlad ban trei bylla khlem da don iaki kot ki sla kiba biang bad ym lah ban tip ha kano ka rukom kine ki bar jylla ki ioh ban wanrung khlem ki kot ki sla.
U Bah Bandari Ryntathiang uba dei u President ka Seng bad u Bah Pateng Marsing uba dei u Working President ka Seng ki la pynpaw iaka jingsngewkhia halor ka jingbym pyntreikam iaka Entry & Exit Point kaba don ha Umling namar kumba ka longtang na kane ka jaka ba la buh iaka Anti Infiltration Check Gate kim lah ban peitthuh bha namar ka jingbun ki kali kiba iaid lyngba ym tang kiba sangeh hapoh ka Jylla Meghalaya hynrei ki don ruh kiba shu iaid lyngba ka Meghalaya hynrei tengteng kine ki briew kiba kam ba ki leit sha Silchar lyngba ka Meghalaya ki don ruh kiba hiar noh ha shiteng lynti tang ban iohrung ha Meghalaya ong ki nongialam ka Seng CoRP.