Shillong Kyllalyngkot 25: Da kaba iatreilang, ka ECHO India , ka Meghalaya State Capability Enhancement Project (SCEP) lyngba ka Government Innovation Lab bad ka Meghalaya Early Childhood Development Mission
(MECDM) ki lah pynlong ia ka Partner Launch Training ka ba ar sngi kaba dei ka lympung ai jinghikai ban kyntiew ia ka early childhood education ha Meghalaya da ki rukom hikai ba thymmai ban pyntbit ia ki sap treikam jong ki nongtrei bapher bapher ha kaba iadei bad ka jing pyn saphriang ia ki jing nang jingtip.
Kane ka Partner Launch training, kaba long ka prokram ai jinghikai ba bniah bad pura , ka pynikumno ba ka ECHO model ka lah ban iarap ia ki nongtrei ha kaba iadei bad ka jing pyntbit ia ki saptrei kam. Ha kane ka jingialang, lah don lang ki riew shemphang ryngkat bad ki nongiashim bynta ki ba lah ai ki jinghikai ba pura, ki jingshem ki ba iadei bad ki rukom trei kam ba man ka sngi ki ban pynsan shuh shuh ia ki sap treikam, ka jing iatreilang bad ka jing ia sam jingmut lang ia kino kino ki jinghikai ba lah ioh ha ka liang ka pule puthi. Ki nong iashim bynta ki kynthup ia ki nongtrei na ki department Social Welfare bad na Meghalaya State Rural Livelihood Society.
U Shri. Sampath Kumar, Principal Secretary & Development Commissioner, Government of Meghalaya, u lah pynshai ia ka jingdonkam jong ka rynsan ECHO. U lah batai ruh ia ka jingdonkam ban kyntiew ia ka jingheh jingsan ki khyllung bad khynnah (Early Childhood Development) bad ka jingkloi jong U ban iatreilang ryngkat bad ka ECHO ha ki por ki ban wan. Ka jylla ka lah pyndonkam ia ka bor technology na ka bynta ban bud dien bad peit thuh ia ki ba bun ki dak ki shin ki ba iadei bad ka koit ka khiah bad ka roi ka par jong ka jylla. Ka jing ia teh kam bad ka ECHO-India kan kham pynkloi ha ka liang ban pynkhlain bad pyntbit shuh shuh ia ki sap treikam ki ba lah don lypa.
Lyngba ka jing pyndonkam jong ka bor technology, ka lah iarap ia ka Meghalaya ban pynduna ka jingiap hapdeng ki longkmie, ki khyllung bad khynnah bad kumjuh ruh ban pynduna ia ka jingkhrew ha ki khynnah (SAM bad MAM) ha ki por ba lah dep kaba pyni shuh shuh balei donkam ban pyntbit ha kane ka liang khnang ban pyn neh ia ki thong ki ba lah jop.
Da kaba kyrshan ban kyntiew ha ka liang ban iashim bynta, U lah kren bad ai jingmut shaphang ka jingsdang ai ki jinghikai ba man ka taiew ryngkat bad ki jing iashim bynta ba man u bnai ha ki
Anganwadi Centers (AWC).
U lah ong ruh ba “ Ngi donkam ka jing pynkylla ia ka rukom treikam ha kaba ki Lady Supervisors kin pynkylla ia ki Anganwadi sentar sha ki Early Childhood Development sentar hapoh kine ki hynriew (6) bnai ban wan. Ia kane ka jing pynkylla donkam ia ka jingshim bynta jong ki khynnah, ka ban pynsan ia ki bor pyrkhat jong ki bad ia kane yn pyniaid shakhmat da ki Child Development Project Officers na ki Anganwadi sentar.
Haba pynkut ia kane ka training ai jinghikai kaba ar sngi, U lah ai jingmut ban buh ia ka thong ban sdang ki rynsan ai jinghikai 55 tylli ka ba ia ryngkat bad ka jing don ki 55 tylli ki block bad U lah pynshai ruh ba donkam ban lam lynti na ka liang ki nongtrei ha ka block ban pyniaid ia ka kam. U. Shri. Pravin Bakshi (IAS), Commissioner and Secretary, Social Welfare Department, Government of Meghalaya, u lah long ruh u Kongsan ha kane ka prokram. U lah kren shaphang ka jing donkam ka bor technology bad internet.
U lah pynshai kumno "ka jing don jong ki tiar ba pyndonkam ia ka bor technology bad internet kan iarap ban pyn kloi ia ka jingsaphriang jinghikai bad pyn neh ruh ia ki ha ka ba bun ngut ki briew khlem ka jingdonkam jong ki ban leit na kawei ka jaka shawei pat haba pyntbit ia ki sap treikam. Ki rynsan ba lah pyndonkam da ka bor technology bad internet ki ai lad ia ki nonghikai ban pynkylla bad pyn wandur ia ki rukom ai jinghikai katkum ka jingdonkam ki nong iashim bynta ki ba na ki jaka ba pher ba pher bad kan iarap ban ai jinghika ka ba pura kham tam ha ki samla" U lah iaroh ruh ia ki rukom treikam ki kynhun kum ka ECHO-India bad ka jingdonkam ban ia kren bad shim bynta mar kylliang jong baroh ki nong trei kam ha baroh ki liang.
Ka Dr. Anuradha Rai, Director jong ka Gender Equity India Pilot hapoh ka Projek ECHO ka lah pynshai shaphang ka jing pyntbit sap treikam haba ai jinghikai bad ka ong ruh " Ban pyntbit ia ka sap hikai hapdeng ki nong treikam ka dei ka ba kongsan tam bad ka ban kyntiew ruh ia ka jingnang jingstad ba pura ha ki khynnah naduh ka por ba dang rit. Ka Partner Launch Training kan iarap ia ki nongtrei ym tang ban hikai hynrei ban pynlong ruh ka rynsan hikai ka ban ktah bad ai mynsiem ia ki nong iashim bynta. Ka ong ruh ba ka ECHO ka dei ka bym rem dor bad ka ban ialam sha ka ban iarap ban ai ka jingstad na ki nong shemphang sha ki paidbah ha shnong.
Ka lah batai ruh ia ki saw tylli ki paia ki ba kyrshan ia ka rukom treikam jong ka ECHO A- Amplification lane ka ban pyndonkam ia ka bor technology ban pynsaphriang ia ka jinghikai haba kynduh ki jingeh na ka bym biang ka por bad ba jngai ki shnong B- Best Practices lane ka jing ia sam ba mar kylliang shaphang ki rukom treikam ki ba seisoh ki ba pynduna ia kino kino ki jingleh shiliang bad ban ailad ia baroh ban ioh lang kumjuh C- Cased based learning lane ka jinghikai kaba kynthup ia ka jingiashem lang jong ki nongiashim bynta ha la shnong D-Web based database lane ka jing pyndonkam jong ka borinternet ban bud dien ia kiei ki ba lah urlong hadien ki jinghikai Haba ai jingkren ha kane ka jingialang, U Bah Ronald Kynta, COO-MECDM u lah batai khyndiat shaphang ka Meghalaya ECD Mission bad u lah ong ruh ba kane ka mission ka kham pher bad ka dei na bynta ban kyntiew ia ka jingim ki khyllung bad khynnah naduh ba dang pun ka kmie haduh in da lah don 8 snem ka rta.
U lah batai ruh ba kane ka dei ka jingiatrei bad snohkti lang hapdeng ki department jong ka Social Welfare, ka Health &Family Welfare, ka Education bad ka Community bad Rural Development. U lah pyn sngewthuh ruh kumno lah ban pyndonkam ia ka rynsan ECHO ym tang ha ka liang ai jinghikai hynrei ban peit bad pyniaid kam hapdeng ki nongtrei bad ha kaba iadei bad ka jing pyniaid kam jong ka projek Ka ECHO India ka treikam ym tang haba iadei bad ka pule puthi hynrei ha ki liang ai jinghikai ban pyntbit sap treikam ha ka koit ka khiah ruh.
Kane ka training ba ar sngi ka ba lah ialam da ka Ms. Aanchal Chauhan, Senior Executive Trainer, ka iadei bad ka jingpyndonkam jong ka ECHO Model bad lah hikai ia ki rukom treikam sha ki nongiashim bynta. Ka rukom ai jinghikai lyngba ka rynsan ECHO ka pyndonkam ia ka jing eksamin kaba bniah ha ka por shuwa ban sdang ai ka jinghikai, ki Live Tele ECHO Sessions bad ka jingdonkam ban pyndonkam ia ki jingshem lane jingtip ha ka por ba pyntrei ia ka kam. Ha kawei pat ka session ba lah islam da u Mr. Ismail Ahmed, Senior Executive Trainer ka kynthup
ia ka jingiashim bynta ban pyrshang kumno ban pyniaid ia ka rynsan hikai Tele-ECHO.
U Mr. Ahmed u lah pynshlur ia ki nongshim bynta ban iatrei ban pyrshang ia kane ka Tele-ECHO da kaba khot ia ki nongiashim bynta na man la ka kynhun jong ki department bapher bapher. Lyngba ki jingkylli bad jing ai jubab ka lah kham pynshai bad sngewthuh shuh shuh ia ki nongiashim bynta ha ka liang ban pyndonkam ia ka ECHO. Shuwa ban pynkut ia ka lympung ai jinghikai, ka lah don sa kawei ka session ha kaba baroh ki nongiashim bynta ki lah ai jingmut lang ia ki jingshem jong ki ha ba pynkhreh ia ka rukom pyniaid ia ki projek ki ba pher da ka jing pyndonkam jong ka ECHO.
Ia Kane ka Partner Launch Training yn kynthup ia ki 12 tylli ki hubs lane rynsan hikai kat kum ka jingdon ki district lane 55 tylli ki rynsan hikai katkum ka jingdon ki block ha ka jylla bad yn sa pyn wandur da ka kynhun ECHO. Lah khmih lynti ba ka PLT kan wanrah ia ka jingkylla kaba bha ha ka jingnang jingstad ha ka por ba dang rit lyngba ka jing iatreilang ki nongtrei kam bapher bapher.
Ka ECHO India ka dei ka NGO ka ba thmu ban ia ka pynroi bad pynbha ia ka imlang sahlang ha ka shnong ka thaw da kaba kyntiew ia ki nong trei kam shnong da kaba pyntbit ia ki sap treikam jong ki. Ka ECHO India innovative hub model ka don ki nongshemphang ba tbit ban iarap ha ka ban ai jinghikai ia ki nong ia shim bynta. Kane ka model ai jinghikai yn pyndonkam da ka bor technology lyngba ka rynsan iECHO ka ban iarap ban pyntbit ia ki sap treikam ha ka rukom ban pynduna ia ka jinglut ksan.
