Nongpoh 3 Nailar 2024: Haka lyngkhuh sngikha jong u radbah Nongialam Sain pyrthei ka Ri India u Dr S Radhakrishnan uba la long teng kum u Vice President ba nyngkong jong ka ri bad uba la bat ruh kum u President baar jong ka Ri ha u snem 1962 haduh u snem 1967 hadien ba la ioh iaka jinglaitluid na ka jingsynshar ki Dohlieh. Une u riewkhraw ka ri u dei ruh uba ieid iaka kam kum u Nonghikai skul, bad ka ba sorkar India ka la ithuh kyrpang iaka sngikha jong une u riew khraw kum ka sngi kyrpang ki Nonghikai hapoh ka ri ia kaba la tip kum ka Teacher’s Day.
Haka jingrakhe iaka sngi kyrpang ba 63 jong ki Nonghikai hapoh ka Ri, ia kaba la tip kum ka Teacher’s Day, ha Ri Bhoi District la pynlong ia kane ka jingrakhe ia kane ka sngi kyrpang ki Nonghikai ha Parish Hall Nongpoh ia kaba la pynlong da ka Office jong ka District School Education Officer haka jingiatreilang bad ka Office jong u Sub Divisional School Education Officer Ri Bhoi District.
Ha kane ka sngi la pynlong iaki programme bapher bapher kynthup iaki jingrwai, ki jingshad bad ki drama lyngkot ban pynsngewtynnad iaki Nonghikai kum ka jingburom iaka sngi kyrpang jong ki.
Nalor kiwei ki Nongshah khot sngewbha ha kane ka sngi la wan ruh ban iadonlang da u MLA ka Jirang Constituency u Bah Sosthenes Sohtun kum u Kongsan, u Deputy Commissioner ka District Ri Bhoi u Shri Abhilash Baranwal IAS kum u Symbud Kongsan, haka jingiadonlang u Shri R Rizal uba dei u SDSEO Ri Bhoi District, ki Nonghikai na ki School bapher bapher kiba don ha Sor Nongpoh lem bad ki khynnah skul.
Ha kane ka jingrakhe iaka sngi kyrpang ki Nonghikai ha Nongpoh, ki Nongshah khot sngewbha haba ai jingkren ki la pynpaw ba ki Nonghikai ki dei ki kmie ki kpa baar bad ka jingdon jong ki haki shlem ai jinghikai ka dei ka jingsaindur iaka jabieng jong ki khynnah skul kiba leit wad jingnang jingstad.
Nalor ki jingrwai, ki jingshad bad drama lyngkot ha kane ka sngi la pynlong ruh iaka jingpynkup burom iaki Nonghikai jong ki School bapher bapher kiba la ioh iaka khusnam bad ka jingithuh na ka Sorkar iaka jingtrei shitom jong ki haka kam kaba ki trei kum ki Nonghikai kiba la ioh iaka khusnam na ka District, na ka State bad kumjuh ruh na ka National Award.
