Nongpoh 3 Nailar 2024: Ka jingnangroi sted jong ki khynnah rit kiba wan wad jingnang jingstad haman la ki shlem ai jinghikai la nanglah ban sakhi na ka por sha ka por, la ka dei haki skul kiba pyniaid da ki bor Sorkar lane ki skul kiba la pyniaid da ki riew shimet. Bad haba ka jingdon jong ki khynnah pule ka la nangkiew ki bor pyniaid skul ruh ki dang donkam ban trei shitom ban wanrah iaki kam pynroi hapoh ka skul kiba kynthup kum ka jingnang pynbun bad thung shuh shuh iaki nonghikai, ka jingpynheh bad pynmih kamra klas kiba thymmai, khamtam ka jingwanrah iaka rukom hikai kaba long katkum ka juk kaba thymmai.
Kine ki jingurlong ki jingangnud jong ki bor pyniaid skul jong ki artylli ki skul kiba don haka Shnong Diwon ha Ri Bhoi District, ki la urlong hynnin ka sngi kata haka 2 tarik u nailur 2024 ha kaba u Nongmihkhmat paidbah ka nongpoh Constituency u Bah Mayral Born Syiem uba dei ruh u nongshongshnong jong ka Shnong Diwon u la pynpoi iaki jingiarap sha kine ki artylli ki school kiba don ha kane ka shnong kata ka Diwon Secondary School bad ka Nongtluh Higher Secondary School, Diwon kiba kynthup kynthup naduh ka jingiarap da ka song pisa na ka bynta ban kyrshan iaka tulop ki Nonghikai, pynbud sa ka jingiarap da ki pyngkha sha ka Diwon Secondary School na ka bynta ki LP bad UP Section, bad ka jingplie iaka Foundational Literacy and Numeracy Classroom lane ka kamra klas kaba hikai ym shuh tang da ka black board lane ki jingthoh hynrei kaba pyndonkam da ki tiar ialehkai jong ki khynnah rit ba kin long myllen bad ruh ban kynmaw iaki jinghikai.
Ha ka Skul Nongtluh Higher Secondary School pat u MLA u la leit ban plie iaka jaka ialehkai Basket Ball kaba u la pynmamg jingiarap na ka liang jong u kum u MLA nangta ka jaka bret nuit ha kane ka skul kaba la pynmamg jingiarap na ka liang u MDC ka thain u Bah Balajied Rani na ka MDC Scheme. Shuh shuh haka jingialang kaba la pynlong ha phyllaw jong kane ka skul la pynkup burom ruh iaki khynnah pule jong kane ka skul kiba la wna shakhmat lane ki School Toper haki kyrdan pule bapher kiba la pyniaid da ka MBOSE. Kaba kham sngewtynnad ha kane ka jingpynkup burom ka long ba kawei ka khynnah pule jong kane ka skul kaba dei na ka jaitbynriew karbi kaba na ka shnong Ingjal ka la ioh Distinction haka subject khasi.
Ha baroh ar tylli ki jaka pynlong jingialang ha kitei ki skul la pynphuh pynphieng iaka programme da ka jingrwai bad ka jingshad jong ki khynnah skul.
Ki Nongshah khot sngewbha haba ai jingkren ki la pynpaw ba kine baroh artylli ki skul katba nangmih ki sngi la nanglah ban sakhi iaka jingkiew jong ka pule puthi bad ruh la ju sakhi iaka jingpass bha jong ki khynnah pule bad lah ruh ban kdew ba kiba bun ki khynnah pule kiba mih na kine ki shlem ai jinghikai mynta ki dei kiba la don ha la ka kam jam bad ruh kiba ju wan shakhmat haka jingim jong ki. Nalor u MLA uba la wna poi ha kane ka sngi kum u kongsan ha baroh artylli ki jingialang, la wan iasakhilang ruh da u Bah Bishar Tmung uba dei u Rangbah Shnong ka Shnong Diwon, ki Rangbah Shnong ki Shnong kiba marjan, ki bor pyniaid skul jong kine ki artylli ki skul, ki khynnah pule lem bad ki kmie ki kpa jong ki khynnah skul