Nongpoh 15 Jymmang 2024 Shisngi hadien ba la wan tep iaka met jong u Rangbah uba na ka shnong Erpakon uba la shah pyniap ha u bar jylla kaba la jia haka 11 tarik u Jymmang 2024, ki Nongialam jong ka Ri Bhoi Peoples Council RBPC Nongpoh Circle haka jingialam jong u President u Samla Mishon Tron, mynta ka sngi ki la leit ban khynra naphang iaki dukan, kynthup iaki jaka trei ba don ki bar jylla kiba la wan ban sah bylla naduh na Shnong Kwinain bad ter ter haduh ha pahamryniai kynthup iaka shnong Erpakon.
Lah ban kdew ba ha katei ka jingleit khynra mynder ka RBPC ki dkhot jong ka seng ki la lap ba baroh ki jaka ba don ki bar jylla ym shem la don kiba don ia ki kot ki sla kiba biang, ki nongialam bad ki dkhot jong ka seng ki la khang syndon iaki dukan bad bthah iaki ba ki dei ban pynbiang lada ki kwah ban dang bteng iaka jingtreikam hapoh ka jylla Meghalaya bad kim lah ban treikam lane kim bit ban plie iaki dukan jong ki.
Lah ban kdew ba kane ka jingkhynra bar jylla jong ka seng RBPC Nongpoh Circle ka wan hadien ka jingbitar ki dkhot ka seng ba ki briew kiba nabar kiba la wan ban treikam bad sengkam hapoh ka Jylla ki la sdang ban leh donbor nalor ba ki la knieh iaka kam bylla jong kiba bun ki kam hapoh ka jylla Meghalaya baroh kawei.
Haba iakren hadien ka jingpyndep ia katei ka jingkynra bar jylla, u Samla Mishon Tron u la ong ba kane ka sienjam kaba la shim da ka Seng na Nongpoh Circle ha katei ka thain bad shen ka seng kan sa pynlong ka jingkhynra ruh iakibar jylla hapdeng ka sor Nongpoh.
Ha katei ka jingleit khynra bar jylla ynda haba lah poi ha kawei ka dukan bam ia kaba la tip kum ka Sardarji-da-Dhaba kaba don ha shnong Pahamryniai kaba la leh jaboh shaba palat naduh ki nala pyntuit um kiba pyntuit iaka um jaboh sha ki nala shnong, ka jingjaboh bad sma iwli ka jaka lait shabar bad kiwei kiwei, ha kaba u Samla Mishon Tron u la buh da ka jingkyntu iaka District Food Inspector ban wan jurip namar ka jingleh jaboh bad ka jingsma iwli kaba lah palat.