Nongpoh, Jymmang, 13:Ka jingnang jingstad ha kine ki sngi ka dei kaba donkam eh haduh katta katta bad kaba long kordor eh, ki kmie ki kpa kiba don sha ki shnong kiba kham kyndong watla ialade kim don jingnang jingstad hynrei ki ju ialeh shitom ban phah skul iaki khun jong ki kaba watla hapdeng ka jingduk bad ka jingjynjar.
Kawei ka Skul kaba don haka shnong Mawiong ia kaba la tip kum ka RCLP School ia kaba la pyniaid da ka jingkyrshan jong ka Balang Katholik na ka Shnong Mawiong ryngkat ka jingkyrshan borbah jong ka Parish Nongpoh ia kaba la pynsangeh lah katto katne snem mynta namar ka jingbymlah shuh ban pynioh da kawei ka ingskul namar ka ingskul kaba la tei naduh u snem 2006 ba la sdang nyngkong ia kane ka skul ka la rim bad ka lah jot lah pei bad ha kajuh ka por ka jingbym lah ban pynioh iaki nonghikai. Katto katne snem ka la iaid bad kiba bun ki khynnah skul ki la wan ban shah hikai ha kane ka skul, hynrei namar katei ka jingeh khlem lah shuh ban pyniaid ia katei ka skul bad ki khynnah na kane ka shnong ki la hap ban beh sha ki skul kiba don kham pajih na kane ka shnong.
Ha kaba kum katei ka por ki Rangbah Balang jong ka Balang Katholik na ka Balang Shnong Mawiong ki la poi ban pynsngew ha u Bah Markus Marten uba dei u President jong ka Seng HNYF Northern Region halor kane ka jingeh, bad hadien katto katne por ba ka la don ka jingiakren ki nongialam jong ka Seng HNYF naduh ka Northern Region bad kumjuh bad u President Rangbah kane ka Seng u Bah Sadon Blah la shim iaka rai ban iarap pynshna iaka ingskul ha katei ka shnong kaba la long da ka jingiamynjurlang jong ki Rangbah Balang ryngkat ka parish Nongpoh.
Haka 11 tarik u Jymmang 2024 ki Nongialam jong ka Seng HNYF ki la wan ban khap ribbon kum ka dak jong ka jingaiti ia kane ka ingskul kaba ki lah dep ban pynshna sha ki bor pyniaid skul.
Haba iakren bad u Bah Matheus Maring uba dei u rangbah uba la hikai ha kane ka skul uba long ruh ha kajuh ka por u Rangbah Shnong ka Shnong Mawiong u la pynpaw iaka jingsngewkmen kaba khraw eh iaka jinglah jong ka Seng HNYF lyngba u Bah Markus Marten uba la shim iaka jingkitkhlieh ban shna pyndep ia kane ka ingskul namar kane ka ingskul ka la long ka jingkyrkhu iaki khun na kane ka shnong khamtam kiba wan na ki longing kiba duk bad kiba duna haka ioh ka kot.
La khap ia u Ribbon kum ka dak jong ka jingaiti ia kane ka ing skul da u Bah Sadon K Blah uba dei u President jong ka Seng HNYF haka jingiadonlang u Bah Markus Marten u President ka Seng na Northern Region, u Parish Priest ka Nongpoh Parish u Fr Peter Syiemlieh, u Bah Ambrus Maring u Rangbah Balang ka Balang Katholik Shnong Mawiong lem bad kiwei kiwei
