Nongpoh 1 Iaiong: Namar ka jingbeh jong ka lyer kaba jur bha hynnin ka janmiet haka por kumba 5 baje lane 5 shiteng janmiet ha kylleng ki jaka jong ka Rilum Khasi, kiba bun ki longing kiba ym lah ban shna iaki ing kiba paka ki la shah rat noh haka jingbeh jong katei ka lyer kaba jur bha, nalor kiwei kiwei ki shnong kiba la ngat ha kane ka jingshah lyngshop haki bor ka mariang, kawei na kita ka dei ka shnong Ingsaw ha Ri Bhoi District, kane ka shnong ka dei kaba dang hap hapoh ka Bhoirymbong C&RD Block ha Mawhati Constituency.
Haba ngi ioh ban sakhi ia katei ka jingjia shah lyngshop haki bor mariang kaba long da ka jingwanbeh jong ka lyer kaba jur ha katei ka shnong Ingsaw, ki ing ki sem ki la shah rat, ki jingthung jingtep ki la shah pynkhyllem, ki jingri jingdup ki la shah rah kylleng kylleng kaba la long ruh hapdeng ka jingmynsaw bad kumjuh ruh ki paidbah ki la mad iaka jingmynsaw bad shu donbok pat ba kam pat don ka jingjia kaba sngewsih kum ka jingduh iaki mynsiem briew, arngut kiba lah kham mynsaw jur ki dei kiba rangbah briew uwei uba la mynsaw na ki bynta ka kti bad uwei pat na ki bynta ka ryndang ba ot ka tin bad kine kiba mynsaw mynta ki dang don haki jaka ai jingsumar.
U Rangbah Shnong ka Shnong Ingsaw u Bah Jebes Suphai u la iathuh ba kane ka dei ka sien kaba nyngkong kaba kum kane ka jingjia ka la wan ban jia kumne hapoh ka shnong watla ka wan ka aiom beh lyer hynrei kam ju don ka jingpynjulor haduh katne, dei tang ha kane ka snem ba ki ingshong ingsah jong ki paidbah ki la shah pynjulor, haaduh 11 tylli ki ingsah briew kiba lah jur ka jingjulor kaba kitei ki longing kim long shuh ban dang iashong iasah kiba kynthup iaki 78 ngut ki dkhot jong kitei ki longing kiba lah julor bun, haba khein baroh ki longing kiba la ngat ha katei kaa jingshah rat ki ing haka eriong ki kynthup haduh 46 tylli ki longing.
kawei na ki ing kaba la shah rat lut baroh ka dei ka ing kaba don markhap jong ki lum shnong katba kine ki dkhot jong katei ka longing ki dang ia bamja lang ryngkat bad ki arngut ki khun kiba dangrit, bad namar ka ing kaba ki sah ka dei kaba la shna tang da ki siej ka la shah rah haka lyer bad leit bret shaba kham pajih ka la phut lut naduh ki rishot bad ki jingker baroh, u kpa jong kane ka longing u la iathuh ba ma u bad ka lok jong u ki la shu kdup iaki khun rit jong ki haduh ba ka lyer ka sdang ban duna bad kim shem la ioh shuh ban ia bam pyndep iaka jamiet jong ki.
Ha kane ka sngi na ka liang jong ka Seng HNYF Mawhati Circle ka la leit ban jngoh ia kitei ki longing kiba la mat ia kane ka jingjia shah lyngshop haki bor ka mariang kiba kynthup ia u Bah Thimaia Mangu uba dei u Adviser lem bad kiwei kiwei ki dkhot jong ka Seng na Mawhati Circle haka jingiadonlang jong u Rangbah Shnong lem bad ki riew rangbah jong ka shnong.