Nongpoh, Jymmang 23: Ka lympung jingialehkai football ia kaba la pynlong ha Mawlasnai ha Ri Bhoi District na ka bynta ban pynsahnam iaka kyrteng jong u nongialam sainpyrthei na Them Ri Bhoi District uba lah bam kwai ha dwar u Blei u Bah EK Mawlong la pynhap pyrda noh mynta ka sngi ha kaba ki artylli ki kynhun ialehkai kiba la iaknieh iaka nam lahduh ki kynthup iaka Shillong Lajong FC pyrshah iaka Benris FC, ka jingialehkai ka la long kaba itynnad bha hynrei ha kaba khadduh ka Shillong Lajong FC ka la ioh ban rah iaka nam lahduh jong katei ka lympung da kaba thep ar kol iaka Benris FC katba ka Benris FC pat kam shem la lah ban pynphai kylla wat tang kawei ruh ka kol watla kane ka club football ka la wanrah ruh ia uwei u nongialehkai bar ri.
Da ka jingwan sakhi jong ki riew pawkhmat bad ki bahaing jong u Bah EK Mawlong kane ka sngi ka la nangphuh nangphieng bad ka jingwanpoi jong ki paidbah ban wan sakhi ia kane ka jingialehkai ha kaba ki paidbah nongpeitkai ki la pyndap hi smam iaka madan ialehkai ryngkat ka jingia risa haba ki rang ialehkai ki pyni iaki sap ialehkai jong ki watla kine ki club baroh artylli kim dei na kane ka thain hynrei ki don shibun ki nongkyrshan.
U Bah Ransom Sutnga uba dei u President jong ka Mawkhar Sports Club uba long ha kajuh ka por u Co Chairman jong ka MIDC ka Sorkar Jylla uba la wanpoi ha kane ka sngi kum u Kongsan haba ai jingkren u la pynpaw iaka jingkmen kaba u ju iohlad ban sakhi ia kiba bun ki lympung ialehkai bad kane ka lympung ialehkai ka dei kawei kaba la pynkmen ia u kum u briew uba ju ieid iaka kam ialehkai namar la pynlong ia kane ka football ban pynsahnam ia u riewkhraw uba long u nongialam sainhima uba la wanrah shibun kiei kiei kiba myntoi naka bynta u paidbah jong kane ka Constituency kiba ki paidbah ki dang ioh ban pyndonkam da ki jingmyntoi kiba u Bah EK Mawlong u la iakhun shitom haki por kiba u dang don ha pyrthei ba u long u MLA kane ka thain.
La ioh ruh iaka jingshad bad ki jingrwai na ki khynnah skul ryngkat ruh ka jingrwai na ka kynhun Chiiung kaba dei ka kynhun kaba ju pynmih iaki video bapher bapher ha Youtube.
Nalor ka jingai iaka khusnam sha ka Shillong Lajong FC kaba dei ka lahduh da ka trophy ryngkat ka song pisa kaba 2 lak tyngka nangta iaka Benris FC kum ka kynhun ba wan baar da ka song pisa kaba 1 lakh tyngka, la ai ruh iaki khusnam kyrpang sha ki nongialehkai kiba la lah ban ialehkai bha ha kane ka sngi.
