Nongpoh, 24. Iaiong: Ka Seng ki samla Pule ka Seng Khasi Students Union na North Khasi Hills District lyngba ka Education Cell na kane ka District Unit kum ka jingnang kyntiew iaki kam pule puthi jong ki samla kane ka thain, myn ha ka 21 tarik ki la lah sdang ban pynurlong iaka jingangnud jong ka Seng ban kyntiew iaki samla pule ba kin nanglah ban jam sa sha kiwei pat ki kyrdan pule jong kane ka juk thymmai kaba mynta kaba ki samla kiba la pyndep iaka Class XII bad kiba dang ap result kiba dang angnud ban bteng iaki jingpule bad ban rung sha kiwei ki kyrdan pule bad kaba donkam ban ialeh iaka Common University Entrance Test Under Graduate lane ka CUET UG la lah ban sdang mynta ka sngi, kumban shu kdew ba ia kane kane Free CUET UG Coaching la pynlong haka jingiatreilang bad ka El Elyon Institute Nongpoh.
Kum ka jingsdang ia kane ka jingai jinghikai la wan ban sakhi da ki nongialam jong ka Seng na North Khasi Hills District Unit kiba kynthup ia u Samla Ferdinald Kharkamni uba dei u President, u Samla James Hitler Mawphniang uba dei u Secretary, u samla Banjop maring uba dei u Education Secretary, I Kong Stefanie M Nongbri iba dei I Skill Development Programme Officer Ri Bhoi District, u Rev PS Tmung uba shim iaka bynta kum u Nonghikai, u Samla Sainkupar Syngkli uba dei u Director jong ka El Elyon Institute kynthup de ia kiwei kiwei ki nongialam jong ka Seng KSU, ki Staff jong ka El Elyon Institute, bad ki samla pule kiba la wan ban pynrung kyrteng ialade ban shah hikai ha katei ka jingai jinghikai ei.
Ki nongshah khot sngewbha haba ai jingkren ki la ong ba ka jingshim jong ka Seng KSU da kane ka sienjam ka dei kaba donkam eh na ka bynta ki samla pule ba kin nanglah ban ia ryngkat ka jingnang jingtip ban rung sha ki kyrdan pule kiba kham shalor kumba long lang kiwei ki samla pule na kiwei ki jylla jong ka ri, bad haba kren halor ka jingthrang jong ki samla ban wan shah hikai hangne ki la ong ba watla ka jinghikai naka bynta ki samla pule ka long kaba ym donkam ban siew hynrei ki samla pule ki dei ban kynmaw ba kiba pynlong ia kane ka jingai jinghikai ki don ka jingkitkhlieh kaba bun bad ka jinglut jingsep kaba bun, kumta ki la kyntu iaki samla ki dei ban shimkhia bad ban wan tikna kaba long ym ka jingmyntoi jong ka eng KSU bad ka El Slyon Institute hynrei ka dei ka jingmyntoi ka lawei jong ki samla pule kiba wan shah hikai