SHA U SYIEM KA HIMA KHYRIM LEIT KYNDUH KI 3 SENG HALOR KA JINGDON KI NONGBUHAI SHNONG BEAIN HA AMDUBIGATH

Nongpoh, Jymmang 26:

Ki Nongialam jong ki 3 tylli ki Sengbhalang na Ri Bhoi District kiba kynthup iaka HYC Ri Bhoi District, ka MPSO Women’s Wing Ri Bhoi District bad ka MPUF Ri Bhoi District haka 24 tarik u Jymmang 2024 ki la leit ban iakynduh kyrpang ia u Paiem Balajied Sing Syiem uba dei u Syiem ka Hima Khyrim kaba long kum shibynta ban buddien halor ka khyndew ka shyiap jong ka bri u 7trep kaba don ha Amdubhigath ha thain Umsiang ha Ri Bhoi District. Kaba lah ban kdew ba kane ka jaka bad ka shnong ka dei kaba la shong la sah da ki jaitbynriew ia kiba la tip kum ki jaitbynriew Tiwa lane ki lalung kiba la ju khot ha Meghalaya kiba don ha Raid Amjong hynrei ki don haduh 42 tylli ki longing kiba la wan ban buhai shnong naduh u snem 1963 na ka ri Bangladesh, hynrei katba dang iaid ki sngi ki por kine ki briew kiba sah ha katei ka jaka ki la nangroi bad ki la sdang ruh ban shna iaki ing ki sem kiba biang bad kiba skhem kiba la shna da ka dew bilat, hynrei katkum ka jingiasoi lane ka Agreement kine nong Bangladesh kim lah ban shna iaki ing kiba paka namar la iasoi ba ki lah ban wansah tang ban wan thung wan tep bad sah trei.

 

Lah ban pynkynmaw ba ha u snem ba lah dep, ki nongialam jong kine ki 3 tylli ki sengbhalang ki la leit ban jurip ia kitei ki jaka bad lap ruh ba ki don 42 tylli ki longing kiba la ioh iaka jingbit ban long kum kita ki nongwansah buhai shnong bad kiba la bud iaka jingiakut lane ka Agreement kaba la dep ban iasoi naduh u Snem 1963 bad u Syiem ka Hima Khyrim, namar kumba ka long kane ka jaka ka dang hap hapoh ka jingpEIT jingkhmih jong u Syiem ka Hima Khyrim. Shuh shuh ha katei ka jingleit jurip jong kitei ki Nongialam Sengbhalang la lap ruh ruh ba ki don sa kiwei pat ki Jaitbynriew na ka Jylla Assam kiba la wan ban buhai shnong ha katei ka jaka kiba mynta ki lah don haduh 12 tylli ki longing da kaba pyrshang ruh ban shna ing da ki ing ba paka lane ki ing kiba kiba la shna bha da ka Dewbilat.

 

Haka 24 tarik u Jymmang 2024 pat, ki Nongialam jong kitei ki 3 tylli ki Sengbhalang kiba Kynthup iaka Seng HYC, ka Seng MPSO bad ka Seng MPUF ki la leit ban iakynduh ia u Syiem ka Hima Khyrim ha Office treikam jong u ha Smit, East Khasi Hills District ryngkat bad ka jingthoh na ka bynta ban kyntu ia U Syiem ba un peit bniah bha ia katei ka jaka khnang ba ka khyndew ka shyiap kan nym jah lane kan nym shah dakhol da kitei ki briew kiba wansah beain ha katei ka jaka, bad ha kajuh ka por ban ailad iaki khasi ba kin shong kin sah ha katei ka jaka na ka bynta ban rep ban riang bad kiwei kiwei ki kam jong ki.