Nongpoh 29 Iaiong:Iaka lympung ialehkai football ha Ri Bhoi Sepngi haka shnong Patharkhmah ia kaba la pyniaid da ka Western Ri Bhoi Sports Association la pynhap pyrda noh mynta ka sngi kata haka 29 tarik u iaiong 2024 ha kaba ki artylli ki kynhun ialehkai kiba la poi ban iaknieh iaka nam lahduh ki kynthup iaka Patharkhmah Sports Club pyrshah iaka Umlakro Sports Club, ka jingialehkai ka la long kaba iakhait bha hapdeng kine ki artylli ki kynhun ialehkai watla ka madan ialehkai ha Patharkhmah kam pat long kaba bit kaba biang, ha kaba kut jong ka jingialehkai, ka Patharkhmah Sports Club kaba dei ka trai madan ka la pynrem noh iaka Umlakro Sports Club tang da ka shikol.
La lah ban iohi iaka jingwan sakhi jong kiba bun ki paidbah kane ka thain ban kyrshan iaka kynhun ialehkai jong ki, bad haba ai jingkren na ka liang jong u Bah Hamletson Dohling uba dei u MLA barim ka Mylliem Constituency uba dei ruh u President ka Meghalaya Football Association kum u Kongsan u la ong ba da ka jingtrei shitom jong u MLA bad ka MDC ka thain ryngkat ka jingangnud jong ka Sorkar ban kyntiew iaki kam ialehkai football hapoh ka jylla, shen ka madan Patharkhmah kan sa ioh noh iaka madan ialehkai kaba paka bad ka ban don syndon da ka artificial turf.
Kum ban shu kdew ba ka Patharkhmah Sports Club kaba dei ka lah duh ka la iohrah iaka song pisa kaba 50 hajar tyngka ryngkat bad ka trophy kum ka khusnam bad shuh shuh kan ioh ruh iaka lad ban leit ialehkai sha ka Meghalaya Super Leauge ka ban sa sdang noh shen ha Nongbah Shillong.
Nalor u Bah Hamletson Dohling kum u Kongsan ha kane ka sngi la iadonlang ruh u MDC ka thain u Bah Victor Ranee kum u Symbud Kongsan, u Bah Anias Ranede uba dei u Presdient jong ka Western Ri Bhoi Dorbar, u Bah Active Pator uba dei u President ka Western Ri Bhoi Sports Association, u Bah Epnas Thangkhiew uba dei U Secretary, u Bah Ripolas Nongtri, nangta ki Sordar Shnong kane ka thain lem bad ki nongialam jong ki sengbhalang kiba kynthup iaki nongialam ka seng KSU, FKJGP, HYC, RBYF nalor kiwei pat.