Nongpoh, 3 Naitung: Na ka jingialang bad ka jingiakynduh jong ki Rangbah Kur na ki kur bapher bapher kiba don ha Ri Bhoi District ha kawei ka kynhun kaba la thaw ha kine ki khyndiat bnai, la nanglah ban pyntyllun bad la nang lah ban lum ban lang iaki rangbah kur jong ki kur bapher bapher hapoh kawei ka kynhun kaba la tip kum ka Synjuk ki Rangbah Kur Ri Bhoi District kaba long ruh ka shnat treikam jong ka Synjuk ki Rangbah Kur Ri Khasi Jiantia.
Ha kane ka sngi kaba mynta kata haka 3 tarik u Naitung 2024, ki nongialam kane ka Synjuk ki la pynlong biang iaka jingiakynduh jong ki Rangbah Kur Ri Bhoi District ban nangpynbeit iaki kam ka longkur longjait hapoh kane ka District bad ha kajuh ka por ban pynbeit ruh iaka sngi ban pynskhem iaki Nongialam kane ka Synjuk ha Ri Bhoi da ki nongialam jong ka Synjuk ki Rangbah Kur Ri Khasi Jaintia.
U Chairman jong ka Synjuk ki Rangbah Kur Ri Bhoi District u Bah RR Makdoh haka jingiadonlang u General Secretary u Bah RB Makri ryngkat kiwei ki Nongialam haba pyntip u la ong ba ki Nongialam jong ka Synjuk ki Rangbah Kur Ri Khasi Jiantia kin sa wan hiar ha Ri Bhoi District haka 20 tarik u Niatung 2024 ha Nongpoh na ka bynta ban pynskhem iaki Nongialam kane ka shnat treikam ha Ri Bhoi District, ha kajuh ka por une u Nongialam u la khot bad wer iaki Nongialam jong ki Sengkur bapher bapher ha Ri Bhoi ba kin wan ha kane ka jingialang ban pyni iaka jingiatylli jong ki Nongialam kur ha Ri Bhoi namar haba don ka jingiakynduh para Rangbah Nongialam Kur.
Kan don beit shibun ki jingiamir jingmut bad ki jinglah ban nangtei pynbha iaka longkur longjait bad ka khein kur khein jait. Ha kaba u la kyntu ruh iaki Sengkur ki bym pat lah ban wan sha ki jingialang jong ka Synjuk ba kin shim ia kane ka jingpyntip kum ka jingkhot lang iaki ruh, bad ruh yn dang pdiang beit iaki sengkur lada ki wan pyniasoh ha kano kano ka por sha ka Synjuk namar ka jingthmu jong kane ka Synjuk ka long ban tehsong iaka jingdon jong ki kur bapher bapher ban long ka jingskhem ki jingpyniaid iaki kam kur kam kha, ki kam riti ki kam dustur bad kiwei kiwei.