Nongpoh 27 Jylliew: Ban wanrah iaka jingnang jingstad lyngba ki shlem ai jinghikai lane ki skul ban saindur iaka lawei jong ki khun kiba rit kam dei ka kam kaba suk lane kam dei ka kam kaba baroh ki lah ban leh, hynrei ka jingkut jingmut bad ka jingiaishah ka pynlong pat ka jingbha hadien habud. Ia kane ka jingkut jingmut jong ki bor pyniaid skul jong ki skul bapher bapher bad ka jingaiti jong ki Nonghikai ban ai iaka jingshakri sha ki khynnah skul ka don ha kylleng ki jaka la ka dei haki skul nongkyndong lane ki skul kiba ha sor bad kumjuh ruh la ka dei haki skul kiba dap tang da ki jingduna lane haki skul kiba lah kham bit kham biang.
Kawei ka skul kaba don haka shnong Mawdiangum ha Nongpoh haka District Ri Bhoi ia kaba lah tip kum ka Kjatlumshami LP School kaba dei ka skul kaba la ioh jingiarap lyngba ka SSA lane ka Sarva Shiksha Abhiyan ka dei kawei na ki skul kaba dang ialeh shitom bha ban ai jingnang jingstad iaki khynnah rit khamtam kiba don ha kane ka shnong kiba wan na ki longing longsem kiba duna haka ioh ka kot. Haka jingleit jngoh jong ki Nongialam ka Seng HANM haka jingialam jong u President kane ka Seng na Ri Bhoi District u Bah Donroi Kshiar haka jingiadonlang jong u Asst. Secretary ka Seng u Bah Wanteibor Makri lem bad kiwei kiwei ki Dkhot kane ka Seng la pynlong iaka jingialang kaba lyngkot hapdeng ki dkhot jong ka Seng ryngkat ki Nonghikai bad kumjuh ki khynnah skul jong kane ka skul.
Kum ka dak jong ka jingnangai mynsiem iaki khynnah skul ba kin dang tista haka jingwan skul ki dkhot jong ka Seng ki la ai sngewbha da ki shatri sha baroh ki khynnah skul kiba don ha kane ka skul, da ka jingkyrmen ruh ba kane kan dei ka jingsdang ban don ka jingiatreilang hapdeng ka Seng ryngkat ki bor pyniaid skul jong kane ka skul, U Bah Donroi Kshiar u la ong ruh ba napdeng kiwei kiwei ki skul kiba dang don shibun ki jingduna ha ka thain Nongpoh kane ka skul Kjatlumshami LP Skul ka dei kawei napdeng ki skul kiba dang duna bha ha ki liang baroh la ka dei haka ingskul, ka jingdonkam naduh ki kamra klas bad ruh ka jingdon jong ki khynnah skul.
Haba iakren bad I Kong Joplin Mangu iba dei I Headmistress jong kane ka skul I la iathuh ba ka jingduna jong ki khynnah skul ka dei namar ba lah bun ki skul kiba lah khambit khambiang kiba don hajan jong kane ka skul bad kiwei kiwei ki daw kiba ka skul ka don hapdeng ka jingbymlah bha ban pyntyllun iaki kam skul namar ki jingduna kiba bunbah kiba ka School Managing Committee ka lah ban kyrshan.
La Seng ia kane ka skul naduh u snem 2002 bad satang kumba 3 snem eiei kan kynjoh sha u mawmer ba 25 snem lane u mawmer Jubilee Rupa, kumba ka long mynta kane ka skul ka ai iaka jingshakri naka bynta ki khynnah kiba dang sdang haka Class Nursery bad haduh ka Class V, bad mynta ki khynnah skul ki don 28 ngut bad ki Nonghikai ki don arngut kiba kynthup ia I Kong Joplin mangu kum I Headmistress bad I Kong Lastborn Ingti.