Nongpoh, 10 Naitung: Ka jingshah kem jong u Bah Bakstar Diengdoh uba na ka Shnong Belahari haka District Ri Bhoi, ka shnong kaba don ha ki bynta khappud bad ka jylla Assam uba dei ruh u Nonghikai skul ha katei ka thain haki bor pulit jong ka tnat Forest ka Jylla Assam kaba la jia naduh ka 10 tarik u Jylliew 2024 halor ka jingkynnoh ba u donkti haka kam khlong maw tuh na kawei ka par maw kaba don haki bynta katei ka thain khappud, dang ha kine ki khyndiat sngi kiba lah dep ka la don ruh ka jingkular na ka liang jong ki bor pulit ka Assam ban pyllait noh ia u, hynrei tad haduh mynta ki bor pulit ka Assam kim shem pat la pyllait ia u, lah ruh ban kdew ba ha kine ki khyndiat sngi ki nongshongshnong ka shnong Belahari ki la pynlong ruh ka jingiamih paidbah ban pyrta sha ki bor sorkar Meghalaya ban tuklar halor kane ka kam kaba donkam kyrkieh eh ban iarap da kaba ia mih paidbah bad iaid rally haka shnong Belahari, ha katei ka sngi Nyngkong kaba mynta pat ki paidbah shnong na katei ka shnong ryngkat bad ki paidbah na ki shnong kiba marjan bad kumjuh ruh ki paidbah na Ri Bhoi Sepngi ki la wan ban hiar ha Patharkhmah ban leit tur sha Office treikam jong u Sub Divisonal Officer (Civil) Patharkhmah Sub Division.
Ka jingthmu jong ki paidbah ban leit tur sha katei ka Office kim shem la lap satia ia u Officer ha katei ka office, kaba ki nongialam ki la ong ba ki thmu ban ai da ka jingthoh ban long ka jingkyntu iaki bor sorkar ka jylla Meghalaya ban iakren bad ka sorkar Assam halor katei ka jingshah kem jong u Bah Bakstar Diengdoh bad khlem kynran dien kine ki nongialam ryngkat u Paidbah ki la khreh ban wan kiew sa ha District Head Quarter ha Nongpoh ban dawa iaka sorkar ba ka dei ban tuklar halor kane ka kam kaba donkam kyrkieh ban iakren iaki bor ka sorkar Assam ban pyllait noh ia u Bah Bakstar Diengdoh uba la shah kem khlem nongrim, namar kane ka jingdon jong ki maw haka kali kaba u niah ha katei ka sngi kaba u shah kynnoh bad shahkem ka dei haka sngi kaba ki paidbah nongshongshnong ki pynlong iaka jingiatrei paidbah ban maramot iaka surok jong ki ha katei ka sngi bad u la shah kem haka por kaba u dang wan phai na ka jaka thep umphniang kali na kawei ka petrol pump kaba hap hapoh Assam.
Ki Paidbah katei ka thain ryngkat ki Nongialam haka janmiet ki la wanpoi ha Nongpoh na ka bynta ban iakynduh ia u Deputy Commissioner ka District Ri Bhoi bad ha katei ka jingiakynduh, ki nongialam haba kren haki lad pathai khubor ki la iathuh ba kin shimkhia mardor ia kane ka kam bad kloi katba lah ban leit pyllait ia u Bah Bakstar Diengdoh uba mynta u dang don ha kti ki pulit Assam.
kumban shu kdew khyndiat ba ka Shnong Belahari kam don iaka surok kaba biang haduh mynta naduh ki por kiba la long shnong naduh ki por ba synshar u phareng, dei kane kaba la pynlong iaki nongshongshnong ba ki ju pynlong iaka jingiatreishnong lane ka social work shisien shisnem kaba long na ka bynta ka jingsuk jong ki paidbah shnong kiba don sha katei ka thain ban khamsuk haka leit ka wan, ka kit ka bah bad kiwei kiwei