Nongpoh August 02: Ka thain Ri Bhoi Sepngi kaba dang shu ioh dang shen kum ka Civil Sub Division hadien ka jingiaid lynti kaba lah 33 snem kum ka Administrative Unit ha Ri Bhoi District lada khein iaka jingkiew jong kane ka thain da ka jingdon jong ki office sorkar bapher bapher ka la long shisha ka jingkyrkhu kaba khraw iaka dong ka thain namar kiba bun ki ka mla lah ban pyndep hapoh kane hi ka thain bad ym donkam shuh ban wan ha Nongpoh. Hynrei ym lah pat ban len ba kine ki Tnat Sorkar kim pat lah ban ai iaka jingshakri kaba biang ia kane ka thain.
Ha kane ka sngi kaba mynta pat kata haka 2 tarik u Nailar 2024 namar ka jingioh jingujor halor ka jingbym lah ka Office u SDO ka Patharkhmah Civil Sub Division ban iarap iaka thain lyngba kane ka office, ka la pynlong iaki dkhot jong ka Seng Ri Bhoi People’s Council haka jingialam jong u President u Bah Jason Lennox Nongrum ryngkat ki dkhot kane ka Seng ki la leit ban jngoh ia katei ka office sorkar bad lap ruh ba ka la long shisha kumba ki ioh iaka jingud jingnam jong ki paidbah.
Ki dkhot jong kane seng ha kane ka jingleit jurip kim shem la kynduh iano iano ruh bad katei ka office ruh ka khang tala, tang hadien katto katne minit la wanpoi u Chowkidar kane ka office bad ki dkhot ka seng ki la ioh ban iakren katto katne bad une u Chowkidar uba la iathuh ba ki Officer bad ki Staff kim da kham wan ha Office, shuh shuh ki dkhot ka seng da ka jingailad jong u Chowkidar ban rung hapoh ki rung shapoh kane ka office ban peit katto katne ki kamra, ki la rung shapoh bad haman la ki kamra haba plie iaka jingkhang ka wan ka jingsma kaba lah sngewthuh ba ym ju don ba rung ba mih bad ym don ba plie iaka jingkhang jong ka kamra. Kaba la pynlong ruh ia u ngab ban sdang shna sting hakhmat jong kawei na ki jingkhang ha kawei na ki kamra kane ka office.
Ki Dkhot jong ka Seng ki la leit ruh ban khmih iaka jaka kaba ka Shnong Patharkhmah ka lah dep ban ai sngewbha iaka jaka naduh ki por kiba kane ka thain ka dang long tang kum ka Administrative Unit na ka bynta ban tei iaka Office treikam hynrei haduh mynta ba iaka thain la kyntiew sha ka Civil Sub Division kane ka jaka ka dang long tang kum ka jaka bad ym shem la don ka jingkhreh ban sdang shna iaka office treikam hynrei ka la mih pynban ka jingshah pynbakla ia u pud sawdong namar ym don shuh ba peit ba khmih iaka jaka.
U Bah Jason Lenox Nongrum haba ai jingkren hadien ka jingpyndep iaka jingjurip ia kane ka office bad iaka jaka kaba ka shnong ka la aiti sha ka sorkar na ka bynta shna ia katei ka office, u la ong ba ki paidbah ka thain kiba don sha kane ka thain ki la iohi iaka jingwan jong ka jingkyrkhu da ka jingphai khmat ka sorkar ban nangkyntiew ia kane ka thain hynrei u President ka RBPC u la ong ba ka jinglong jingman jong ki office sorkar kiba kiba watla ki don ki jaka treikam hynrei kim shem la treikam bad kane ka jingkyrkhu ka la kylla long pynban ka jingtim iaka thain namar I kam iba rit kiba donkam ban pyndep hynrei ki dang hap hi ban wan ha Nongpoh ban pyndep iaki namar ka jingbym don ki nongtrei jong ki shnat treikam ka sorkar.
