Nongpoh, May 22: Katba dang iaid ki sngi jong ki jingpyrshang ban wanrah iaka jingai jinghikai iaki khynnah pule haki kyrdan pule bapher bapher ha Shnong Mawrong ha Ri Bhoi District ha kawei ka shlem ai jinghikai lane ka skul kaba la tip kum ka Mawrong RMSA Higher Secondary School, la nanglah ban pynbha shuh shuh ia kane ka shlem ai jinghikai ha kaba haka 20 tarik u Jymmang 2025 la plie iaka ingskul thymmai jong kane ka skul ia kaba la tei haka jingpynmang pisa kaba 2 klur 20 lakh tyngka, la tei ia kane ka ing skul na ka scheme shna ing skul jong ka RMSA lane ka Rashtriya Madhyamik Shiksha Abhiyan.

Ki bor pyniaid skul ha kane ka sngi ryngkat ki nonghikai bad ki khynnah skul ryngkat ruh ki kmie ki kpa jong ki khynnah skul ki la ialumlang ha phyllaw jong katei ka ingskul ban sakhi iaka jingwanplie paidbah ia kane ka ingskul kaba thymmai da u MLA ka thain u Bah Charles Marngar.

Kumban shu kdew khyndiat ba ha ki katto katne snem haka por kaba ym pat ioh ia kane ka ingskul kaba thymmai la pynlong iaki jinghikai iaki khynnah hapdeng ka jingiakhapngiah ba la phiah iaki kamra klas ryngkat bad ki Secondary Section bad ki nonghikai ki ju angnud bha ban iohnoh iaka skul building kaba heh na ka bynta ki khynnah Higher Secondary Section, bad dei tad haduh ka 19 tarik u Risaw 2021 ba la buh ia u Mawnongrim ban tei ia kane ka ingskul bad nangne ka la iaid ka jingshna iaka ingskul bad hadien 4 snem tam ka jingshna, la plie paidbah mynta ka sngi bad da ka jingkmen halor ka jingsdang ka bit ka biang jong ka skul, la pynlong iaka jingialang kaba kyrpang ban plie paidbah ia kane ka ingskul bad ha kane ka jingialang nalor ki jingai jingkren jong ki nongshah khot sngewbha, la ioh ruh iaka jingshad bad ka jingrwai na ki khynnah skul.

Haba ai jingkren hapdeng ka jingialang, ka Kong S Wahlang kab adei ka Principal Incharge jong ka Mawrong RMSA Higher Secondary Section ka la pynpaw ba ki paidbah ka thain ki la nang shaniah ia kane ka skul bad ka jingwan jong ki khynnah skul ka la nagkiew katba nangmih ki snem kaba long na ka 7 ngut ka jingdon ki khynnah skul haka jingsdang, mynta ki khynnah skul ki lah don haduh 43 ngut tang haka Higher Secondary Section.

Nalor u Bah Charles Marngar u MLA ka thain uba la wanpoi kum u Kongsan ha kane ka sngi la iadonlang ruh u Deputy Commissioner ka District u Abhilash Baranwal, ka Kong KB Jyrwa kaba dei ka DSEO Ri Bhoi District, u Bah BB Makdoh uba dei u Rangbah Shnong ka Shnong Mawrong, ka Kong S Wahlang kba dei ka Principal Incharge ka Higher Secondary Section, ka Kong C Sun kaba dei ka Headmistres ka Mawrong RMSA Secondary Section lem bad kiwei kiwei ki riew pawkhmat ka thain