Nongpoh June 4: Ka jingrakhe jong ka District Ri Bhoi iaka lyngkhuh dap snem ba 33 naduh ba la ioh bad thung ia kane ka thain kum kawei na ki District jong ka Jylla Meghalaya kata naduh u snem 1992 haki por kiba u Maheh Dr DD Lapang uba dei u nongialam sainpyrthei na kane ka thain u la long u Myntri Rangbah jong ka Sorkar Jylla.

Ha kane ka sngi kaba mynta, la pynlong iaka jingrakhe Ri Bhoi Foundation Day ha Parish Hall Nongpoh haka jingwanpoi ki riewpawkhmat bad ki nongialam ka thain.

La pynphuh pynphieng ia kane ka programme da ki jingrwai kiba la thaw bad rwai kyrpang iaka jinglong kyrpang jong ka District.

Kum ka jingburom iaka jingdon jingem ka mei mariang bad ka jinglah jong ki paidbah kane ka District ban nangpoi shakhmat shaphrang, u Bah Eric Kevin Dkhar uba dei uwei na ki Majistor ka District u la ai jingkren ryngkat ka jingpyni da ka Giant Screen iaki kam kiba kum ka District ka la iaid bad don ka jingiadei bad kiwei ki briew na kiwei ki District bad ki jylla bad kumjuh ka jingiadei bad kiwei ki kynhun na kiwei ki ri.

Nalor kiba bun ki riewpawkhmat bad ki nongialam ka thain kiba la wanpoi ha kane ka sngi, la iadonlang ruh 2 ngut ki MLA ka District kiba kynthup ia u MLA ka Nongpoh u Bah Mayral Born Syiem, u MLA ka Jirang u Bah Sosthenes Sohtun, u MDC ba shusieh ka KHADC U Bah Mathew Makdoh, u Deputy Commissioner ka District u Abhilash Baranwal, ki ADC ka District kiba kynthup ia u Raja Brahma, u Bah Eric Kevin Dkhar bad ka Kong Balakyntiew Rani, kynthup de iaki officer sorkar jong ka District na ki shnat treikam bapher bapher jong ka District