Nongpoh, May 22: Hadien bun tylli ki wad jong ka jingiakynduh na ka bynta ban pyrkhat iaka jingialeh ban kyntiew iaki ka ialehkai haka thain, bad ka jingkyrshan kaba na ka por sha ka por iaki nongialehkai khamtam haka liang ka jingialehkai football na ki bynta ka Dong Mihngi ka District Ri Bhoi. Haka 17 tarik u Jymmang 2025 ka kynhun ki riew rangbah kiba la kyrshan bha iaka Ri Bhoi District Sports Association RBDSA haki bun tylli ki snem ka la ioh iaka jingithuh ym tang da kaba jingiakhublei kti ne ka jingiakren hynrei ki nongialam jong ka Meghalaya Football Association da lade ki la wan ban aiti iaka syrnod jingithuh iaka kynhun kaba la tip kum ka Ri Bhoi Mihngi Sports Association RBMSA.

Ia kane ka jngialang la pynlong ha Dorbar Hall jong ka Shnong Lumdaitkhla Bhoirymbong ha kaba ia katei ka jingialang la pyniaid da u President ka RBDSA u Bah RB Shadap kaba la wan ban iashimbynta naduh ki nongialam ba hakhmat duh jong ka Meghalaya Football Association MFA, ki nongialam jong ka Ri Bhoi District Sports Association RBDSA, ki nongkitkam jong ki Sports Club bapher bapher kiba don haka thain Ri Bhoi Mihngi, ki rangbah shnong lem bad kiwei kiwei. Shuh shuh kum ka jingpynsah jingkynmaw iaka sngi jong ka jingioh iaka jingithuh, la plie bad buh ia u Mawnongrim jong ka jingithuh ka MFA iaka Ri Bhoi Mihngi Sports Association.

Haba ai jingkren bad pynsngew iaka jingiaid lynti jong ka Ri Bhoi Mihngi Sports Association u Bah CL Masharing ia uba la jied ban long kum u General Secretary jong katei ka kynhun u la iathuh da kaba ong ba hadien kiba bun tylli ki jingialang ha kine ki 3 snem da ka jingkyrshan bad ka jingdon jong ki 41 tylli ki Sports Club kiba don ha kane ka thain ban iasoh sha kane ka kynhun kaba la pynlong iaki nongialam jong RBDSA kaba long kum ka Sengkmie ban shimkhia ha kaban ailad noh ban phiah na ka bynta ka jingnanglah ban kyntiew iaki kam ialehkai sha kane ka thain kaba ka jingmyntoi jong ki samla nongialehkai.

Shuh shuh ha kane ka sngi nalor ka jingai iaka syrnod jingithuh kum ka Provisional Certificate ki nongialam jong ka Ri Bhoi Mihngi Sports Association kin hap ban trei shitom ban bud iaki kyndon jong ka MFA haki 3 snem kynthih kaba long kum ka jingpynlong iaki Football League, ki Division bapher bapher, ka jingdonkam ban don iaka madan ialehkai bad ka jingdonkam ban phah report man la ka snem sha ka MFA iaki jingtreikam jong ka kynhun khnang ba ka MFA ruh kan khmih thuh iaki jingtreikam jong ka Association bad ban lah ban ai sa ka jingithuh kaba pura bad ban iateh paralok lane Affiliate bad ka MFA.

Nalor ki nongialam jong ka RBMSA bad ki nongkitkam jong ki Sports Club bapher bapher kiba don ha kane ka thain, la iadonlang u President ka MFA U Bah Hamletson Dohling, u Secretary u Bah Suresh Syiem, u Bah RB Shadap President ka RBDSA, u bah RR Kynsai Makdoh Adviser ka RBDSA, u Bah GS Shadap Senior Vice President ka RBDSA uba bat ruh kum u Adviser ka RBMSA, u Bah HK Marwein u President thymmai ka RBMSA, u Bah CL Masharing General Secretary ka RBMSA lem bad kiwei kiwei.