Nongpoh, 8 Risaw 2024H: aba pynleit jingmut ia kano kano kaba kam kaba ngi trei ne ngi leh ka dei kawei na ki kam kiba pynlong briew man briew namar shisien haba ngi trei ne ngi leh iaka kam kaba ngi don iaka jingsngewtynnad ngi leh naduh dohnud bad kata ka kam ka long beit kaba janai, bad ki para marjan lane ki paralok para jor kiba iohi iaka jingjop ki ju wan ban ai mynsiem ryngkat ka kyrkhu kyrdoh.
Kawei ka samla na ka shnong Umran Dairy Ri Bhoi District kaba dei kawei na ki samla nongialehkai Body Building, lane ka nongialehkai pyni dohksah ka samla Daribha Kharkongor kaba dei ka khun ba 8 jong ka Kong Isrin Mawnai bad u Bah Julius Kharkongor hadien ka jingjop haki jingialehkai pyni dohksah na ki lympung bapher bapher kiba la pynlong ha kylleng bad hadien ka jinglah ban wan shakhmat bad rah iaka kyrdan ba nyngkong lane ka Gold Medalist na ka 4th Mr and Ms East India 2024 bad ruh ka Gold Medal lane ka nongjop na ka 19th Mr and Ms Meghalaya 2024, ka Seng Samla Shnong Umran Dairy haka jingialam jong u president u Bah Wansing Wardkhar bad u Bah Belingstone Bina uba dei u Education Secretary ryngkat ka Seng Ri Bhoi Wellfare Association RAWA ki la leit ban pynkup burom halor kane ka jingwanrah nam wanrah burom jong ka samla Daribha Kharkongor iaka shnong ka thaw bad kumjuh iaka District lyngba ka jingjop na kitei ki rynsan pyni dohksah.
Khyndiat haba iakren bad kane ka samla ka la iathuh ba ha kaba nyngkong kam shem la don jingmut ban pyntbit ialade ha kane ka kam pyni dohksah haki rynsan hynrei haka jingleit ialehkai Gym na ka bynta ka jingpynitynnad iaka met ka phad lane fitness hynrei haka jingai jingmut jong u Nonghikai na ka jaka kilan met kaba don ha Rynjah Shillong kaba la tip kum ka Iron House Gym lyngba u Bah Bransley D Nongkynrih, ban iashimbynta ha katei ka rynsan namar ka jinglong ka met ka phad jong kane ka samla ka don iaka lad ban poi sha kane ka thong, bad khlem pynslem, kane ka samla ka kynjoh ktien na la ka jong ka ing ka sem khamtam na ka kmie, bad hadien ka jingai mynsiem jong ka ing ka sem kane ka samla ka la shim iaka rai ban kilan met khambha shuh shuh khnang ban leit ia shimbynta sha kitei ki lympung bad khlem jingsepei ki jingialeh shitom jong ka ban kilan met ka la ioh ban rah iaka nam jop lane iohrah iaka kyrdan kaba nyngkong. Shuh shuh lyngba kine ki jingjop kane ka samla mynta ka la shah jied ba nleit iashimbynta sha kawei pat ka lympung kaba dang khamheh shuh shuh kaba la tip kum ka Mr & Ms India 2024 ka ban sa long haka 9 bad 10 tarik u Naiwieng 2024 ha Nehru Indoor Stadium ha Chennai, Tamilnadu.
Kane ka samla ka la pynpaw ruh ia shibun ki jingdonkam ban aiti ialade ban tyngkai bha iaka bam bad ruh ban kiar na ki jingbam ki bym iadei bad kane ka jait jingialehkai bad haba bam ruh ka don da ka jingthew wat iaka um lane ka mluh haka por ba pynkhreh katto katne bnai shwa ka jingleit iashimbynta haki jingiakop pyni dohksah.
Ka Samla Daribha ka la iathuh ruh ba ym shem pat la slem ba ka leit pyntbit ialade ban rung sha ka kam pyni dohksah hynrei ka jingplielad jong u Blei iaka jingim jong ka ban iohlad ban pyni iaka sap kaba U Blei u ai haka ka la pynpaw iaka jingsngewnguh kaba khraw eh bad khamtam iaka ing ka sem kaba la ai mynsiem iaka. Ka la ong ruh ba haba ka pynlut iaka por ha kaban ialehkai bad kilan met man ka sngi, kam don por shuh ban leh iaki kam ki bym myntoi hynrei na ka kam kaba ka trei kum ka nongiasaid ain lane ka Advocate bad bteng pat iaka sngi kum ka nongialehkai ka la pynkylla long iaka ban shait ban khlain bad ruh don beit tang ki jingbha bad ki kam sniew kim iohlad bad wan bad ka, kumta ka ai mynsiem iaki samla kynthei bad shynrang ba nalor ka kam kaba ki trei ki ktah ban pyndap pynbiang iaka ing ka sem, ka donkam shibun ban pynlut por pat sa haki ka ialehkai bad ka jingim kan bha bad suk kynjai.