Nongpoh | 16 Naiwieng 2025 Ka shnong Umdap, kaba kynthup ia ki ar tylli ki dong — Umdap Dumu bad Umdap Rngi — ka dei kawei na ki shnong ha Nongpoh Constituency kaba dang sahdien ha kiba bun ki liang kum ka lynti syngkien, ka roi ka par bad ki lad jingkiew shaphrang. Mynta ka sngi, ka 15tarik u Naiwieng 2025 u MLA ka thain, u Bah Mayral Born Syiem, u la leit ban jngoh ia kine ki ar tylli ki dong ban ioh bishar bniah ia ki jingdonkam ba kyrkieh.
Ha kane ka jingleit jngoh, u MLA u la lumlang ia ki nongialam shnong bad u la sngap bniah ia ki jingeh ba ki pynsngew. Ki nongialam shnong ki la pyntip shaphang ka ingmane jong ka Balang Catholic kaba la jot tnum bad kiwei ki jingdonkam ba iadei bad ka roi ka par jong ka shnong.
Hadien ba ki la pynsngew ia ki jingeh, u MLA u la pynpaw ka jingsngewkhia halor ka jingjot jong ka tnum ingmane bad u la kular ban ai synniang 1 lakh tyngka na ka bynta ban pynbha noh ia ka tnum khlem da ap ia ka jingpynmang scheme.
Ha ka jingkren jong u, u MLA u la kyntu ruh ia ki ar dong jong ka shnong ba kin thaw noh ia ka kynhun VDP (Village Defence Party) na ka bynta ka jingshongshngain jong ka shnong. U la kular ruh ban ai ia ki jingdonkam kum ki torchlight, lathi, shatri lane raincoat na ka bynta ki liang pahara shnong.
Ha kane ka sngi la iadonlang u Bah Anjelius Maring, Rangbah Shnong ka Umdap Dumu; u Bah Alexander Maring, Rangbah Shnong ka Umdap Rngi; ki rangbah balang ka Balang Umdap; ki longkmie, longkpa bad ki samla shnong.
