Nongpoh | 17 Jylliew | 2025 Hadien 2 snem ba la thung iaka Pastorate ba pura kaba la tip kum ka Narlein Nongbah Pastorate kaba hap hapoh ka Ri Bhoi Sepngi Presbytery kaba la thung haka 29 tarik u iaiong 2018, kaba kane ka Narlein Nongbah Pastorate ka kynthup iaki 3 tylli ki Balang kiba kynthup iaka Balang Presbyterian Mawrong, ka Balang Presbyterian Umkei, ka Balang Presbyterian Mawsyiem kynthup iaka kynhun Balang Ksehkynjoin, bad na ka jingtyllun jong ka por bad ka jingdawa iaka jingdonkam kiba bun khamtam ka jaka shong jingialang pyrkhatkam bad ka jingbuh beit buh ryntih iaki kot ki sla bad ki tiar ki tar. Ka Narlein Nongbah Pastorate kaba dei kawei na ki Pastorate jong ka Presbytery kaba dang lung haka jinglong Pastorate ba pura hynrei kaba la trei borbah na ka bynta ban pyniaid beit iaid ryntih iaki kam hapoh kane ka Pastorate jong ka Balang Presbyterian ha Ri Bhoi Synod.

Haba pynpaw halor ka jingiaid lynti jong ka Pastorate u Rev MB Makri uba dei u Pastor Incharge jong ka Pastorate u la pynkynmaw ia katto katne ki jingeh haka jingiaid lynti kum ka Pastorate kaba dang thymmai hapoh ka Presbytery, u la iathuh da kaba ong ba la ju buh ia u synniang na ki paid riew ngeit haki jingiaseng bapher bapher jong ka Pastorate na ka bynta ban thied iaka jaka ban tei iaka office treikam jong ka Narlein Nongbah Pastorate bad na kane la nangioh ban thied iaka jaka bad kumjuh ka jingia thoh iatar iaki ko ki sla khyndew, bad ka jingkyrkhu u Blei lyngba ki shakri jong u, la pynmang ruh iaka jingpynmang jingiarap na u MLA ka thain u Bah Charles Marngar lyngba ka Special Rural Works Programme lane ka SRWP kaba lah sanction 5 lakh tyngka bad mynta ka sngi ka 17 tarik u Jylliew 2025 la buh ia u Mawnongrim ban tei ia kane ka ing Pastorate kaba long kum ka jingbuh jingkynmaw bad shen yn sa sdang noh ban trei ia kane ka kam.

Haba ai jingkren u MLA u la ong ba un dang bteng ban pynpoi iaki jingiarap kum u nongmihkhmat paidbah bad pyntikna ba ki jingiarap kin sa nangpoi kaba long na ka bynta ki paidbah ka thain bad ym tang katta hynrei na ka bynta ka burom jong u Blei ban pyntyllun iaki kam bad pyniar iaka hima jong u.

La pynphuh bad pynitynnad iaka jingplie ia u Mawnongrim da ka jingrwai ki khun samla. Ha kane ka sngi nalor ka jingdon jong u Bah Charles Marngar uba deiu MLA ka thain uba la pynmang ia kane ka jingiarap sha ka Pastorate, la iadonlang ruh u Pastor Incharge ka Pastorate u Rev MB Makri, ki Nongsharai Balang, ki Nongialam shnong bad kiwei kiwei.