Nongpoh, 22 April 2025: Namar ka jingsngew klumar jingmut halor ka jingpoi Bill Light kaba heh kaba ki nongshongshnong ka Shnong Umtasor Mawdkhar ha Ri Bhoi District ki ioh pdiang iaka Bill Light ha kine ki khyndiat sngi ka la pynlong iaki ba kin leit ban tur sha Office treikam u Assistant Executive Engineer Nongpoh Rural Distribution Sub Division ha Nongpoh ban pan jingpynshai na ki nongtrei bad ioh ruh iaka lad ban leit iakynduh ia u Executive Engineer.
Ki paidbah nongshongshnong ki la pynpaw iaka jingbym sngew iahap iaka jingpynpoi iaka Bill Light kaba ym iahap satia bad ka jingpyndonkam jong ki, bad kaba lam sha ka jingkhie bitar bad ban leit tur sha office treikam ka tnat sam bording elektrik kaba don ha Nongpoh.
Arngut ki nongshongshnong kiba kynthup ia ka Kong Felita Muruh bad u Bah Victor Dkhar, ki la pynpaw iaka jingsngewkhia bad ha kajuh ka por ka jingkyntu iaka sorkar ba kan shimkhia ban pynbeit ia kane ka jingeh jong ki paidbah khamtam ki shnong kiba don ha Nongkyndong kaba ki bill light kim ju poi tikna.
