Nongpoh | 17 Jylliew | 2025 Hadien 2 bnai tam ba ka KSU Umsning Circle ka la pynkut iaka lympung ialehkai football ha Madan Umsning Sports and Cultural kata haka 4 tarik u Iaiong 2025 kaba la pynlong kum ka Awareness Programme halor ka jingsniew jong u Drugs bad ha kajuh ka por ban lum ia u synniang na kiba ieid football khnang ban ioh thied ambulance bad ban ai shakri sha ki paidbah kiba donkam jingiarap haba wan ka pang ka shitom, mynta ka sngi, ka KSU Umsning Circle ka la lah ban pynpoi iaka kali Ambulance ha Umsning ia kaba la thied na ka jingmih ka pisa na ka Football Tournament kaba dang shu pyndep dang shen.

Ia kane ka kali ambulance ne ka kali kit nongpang kaba la pynmang ban ai jingshakri ia ki paidbah ka thain Umsning la wan ban pyllait paidbah da u General Secretary ka Seng Sengkmie da kaba khap ia u ribbon bad u President ka Seng na North Khasi Hills District u Samla Ferdinald Kharkamni uba niah kum ka dak jong ka jingpyllait paidbah.

Ki dkhot ka seng KSU Umsning ha kane ka sngi kaba la pyllait iaka kali kit nongpang ka la kynmaw kyrpang ruh iaka sngi khlad jong u Samla Rangbah Biswal Paul Makri uba dei u Dkhot ka seng KSU uba la khlad noh haka jingiakhun pyrshah iaki briew Nepali kiba la pyrshang ban leh donbor iaki khun khasi ha Motphran ha Nongbah Shillong bad kumjuh ka jingiakhun pyrshah iaki CRPF kaba la jia ha u snem 1987 haka 17 tarik u bnai Jylliew.

Haba ai jingkren ki nongialam jong ka Seng ki la pynpaw iaka jingiaroh bad ka jingpyrto iaka Umsning Circle kaba la leh ia kine ki kam ban long ka mawmer jingsah kynmaw iaka Seng KSU baroh kawei namar hadien ka jingpyllait paidbah ia kane ka kali Kit Nongpang ha Umsning, ka KSU mynta ka lah don 15 tylli ki Ambulance ha kylleng ka Rilum Khasi Jaintia.