Nongpoh, 12 Naitung: Da ka jingnangnud ban nangpynbha iaka imlang sahlang da kaba pyrshang ban don da ka kynhun kaba treimon sngewbha bad ban ioh iarap iaki paidbah ha kiba bun ki liang ka Umsning Satellite Club kaba dei kawei na ki shnat treikam jong ka Rotary Club kaba don ki shnat treikam ha kylleng ki ri ka pyrthei, mynta ka sngi ka la nanglah ban pyntyllun bad pyniaid iaki kam jong kane ka kynhun ha kaba hadien ka jingkut noh ka samoi treikam jong ki nongkitkam kane ka kynhun la lah ban pynthymmai iaki nongkitkam kiba hakhmat, ia kane ka jingialang pynthymmai iaki nongkitkam kaba la pynlong ha Umsning la pynlong haka jingiadonlang ki Nongialam ka Rotary Club Orchid City Shillong kiba kynthup ruh iaka kong Mary Anne Jyrwa kaba dei ka President, ka kong Reema V Diengdoh kaba dei ka Secretary bad kiwei kiwei.

Ka kynhun ki riew rangbah bad ki longkmie haka shnat treikam ha Umsning watla kam pat lah ban long ka Rotary Club kaba pura namar ka jingbym pat lah ban pynkynthup iaka jingdon ki dkhot katkum ka riti pyniaid kam ka Rotary Club hynrei ka la nang ia ksait ban leh shibun ki kam kiba iarap iaki paidbah hapoh ka thain.

Haka jingjied iaki nongkitkam kiba thymmai, ka kynhun ka la jied ia u Bah Shemphang Lyngdoh ban long u President uba thymmai uba dei u rangbah uba ju mih bha shakhmat ban iarap iaki paidbah ha kiba bun ki liang, nangta la jied pynthymmai biang ia u Bah Gregory Kharumnuid kum u Secretary ba thymmai watla u la kut ka samoi treikam bad kiwei kiwei.

Hashwa jong kane ka jingialang pynthymmai nongkitkam, ka shnat treikam ka Rotary Club Orchid City Shillong haka jingiatreilang bad ka Umsning Satellite Club ka la leit ban ai sngewbha iaka Umsning Police Station da ki Florescent Jakcet 25 tylli bad 4 tylli ki Traffic Cones kaba long kum ka jingiatreilang bad ka tnat pulit bad ha kajuh ka por ka jingpynsuk iaki paidbah kiba leit ba wan ha shilynter ka surok bah kaba hap haka thain Umsning.

Haba iakren bad u Bah Shempahg Lyngdoh uba dei u President bathymmai ka Umsning Satellite Club bad u Bah Gregorry Kharumnuid uba dei u Secretary ki la pynpaw iaka jingkmen ba la lah ban nang pyntyllun iaki kam ka kynhun ha Umsning bad ki la buh ruh iaka thong ba shen yn sa lah ban pynlong noh iaka Umsning Satellite Club kum ka Rotary Club kaba pura khnang ba yn lah ban treibha iaka kam.