Nongpoh, Nailur 9: Haka jingiaid lynti ban ai iaka jingshakri sha ki paidbah ka them Ri Bhoi da kaba pynrung iaka jingnang jingstad sha ki samla kane ka District, ka Ri Bhoi College Nongpoh mynta ka lah jam sha u Mawmer ba 40 snem jong ka jingai jingshakri. Haka jingbuh jingkynmaw halor kane ka jingiaid lynti ki bor pyniaid jong kane ka College ka la pynlong iaka jingrakhe kyrpang ia kane ka jingdap snem jong ka jingiaid lynti da kaba pynlong iaki jingialehkai bapher bapher hapoh ka College, ha kajuh ka por ki bor pyniaid College ki la pynlong ruh iaka jingkynmaw kyrpang iaka jingaiti bad jingshakri jong u Principal ba nyngkong jong ka College uba la bamkwai ha dwar u Blei, kata, u Babu R.I. Masharing uba la ju ia khot ieid da baroh kum u Babu Ialam uba la shimti iaka kam Principal kane ka College da ka jingangnud ban kyntiew iaka nang ka stad hapoh ka District Ri Bhoi kaba long haka por ka jinglong MLA u Dr DD Lapang bad u MDC u Bah RR Kynsai Makdoh.
Ha kane ka sngi pynkut ia kane ka jingrakhe la pynlong iaka programme kyrpang hapoh ka Conference Hall jong kane ka College ban kynmaw burom iaka jingiaid lynti jong ka College naduh ki por kiba lah sdang iaka.
U Kongsan jong kane ka Programme u Bah Mayral Born Syiem uba dei u MLA ka thain haba ai jingkren u la ringdur iaka jinglen lade jong ki Nongseng ia kane ka College kum ki nongialeh laitluit ka Ri India haka jingialam u Mahatma Gandhi ban lait na ka jingsynshar ki dohlieh kaba u la pynsyriem iaka jingiakhun tyngeh jong ki Nongseng ia kane ka College kum ka jingiakhun pyrshah iaka jingbiej bad kane ka College mynta ka la lah ban ieng kumne dei da ka jingtrei borbah jong ki Nongseng kumjuh ka jingaiti ban shakri jong u Babu R.I Masharing uba la bamkwai ha Dwar u Blei. Bad lah ban kdew ba kane ka College mynta ka la sei ia kiba bun ki khun samla kiba la don haki kyrdan baheh hapoh ka Jylla bad ruh ka la lah ruh ban sei iaki syntiew kiba pynphuh pynphieng iaka Ri Bhoi ym tang ki syntiew hynrei iaki soh kiba bha kiba la kylla long ki Nonghikai hapoh kane hi ka College.
Ban nang pynsngewtynnad shuh shuh ia kane ka Programme ki khynnah pule jong ka College ki la pynsngewtynnad da ki jingshad bad ki jingrwai
