Nongpoh, 15 April 2025. Kum ka jingithuh iaki khynnah skul kiba don iaki sap ym tang haka pule hynrei ban ithuh ruh haka jingialehkai, ka Office jong u District Sports Officer Ri Bhoi District haka jingiatreilang bad ka Ri Bhoi District Sports Association mynta ka sngi la sdang iaka District Level Inter School Athletic Meet 2025 ia kaba la pynlong ha Madan NSCA Pahamsyiem Nongpoh.
Ia kane ka Lympung ialehkai jong ki khynnah skul la pynlong da ka jingwaniashimbynta jong ki Khynnah skul na kylleng ki skul kiba don ha Ri Bhoi District.
Nalor kiwei kiwei ki jait jingialehkai ha kane ka sngi sdang la pynlong iaki jingialehkai kiba kynthup iaka high jump, Short Put, 100 meter race, ka 60 meter race ka 600 meter race bad kiwei kiwei. Mynta ka snem ki don haduh 36 tylli ki skul kiba la wan ban iashimbynta ha kane ka District Level Inter School Athletic Meet 2025 ha kaba don ruh katto katne ki skul kiba ym shem la lah ban wan iashimbynta. Na kitei ki 36 tylli ki skul kumba 900 tam ki khynnah ki wan ban iashimbynta haki jingialehkai bad ki jingiakop bapher bapher.
Kane ka District Level Inter School Athletic Meet 2025 kaba la sdang mynta ka sngi kan kut haduh ka sngipalei jong ka taiew kata haka 17 tarik u Iaiong 2025 bad kan neh ban pynialehkai ha kine ki 3 sngi lynter
Kum ka jingsdang jong ka jingialehkai ha kane ka sngi sdang la plie pyrda iaka District Level Inter School Athletic Meet 2025 da u Block Development Officer ka Umling C&RD Block u Bah Eric Kevin Dkhar kum u kongsan haka jingdonlang u Bah Bobby L Nongbet u ba dei u District Sports Officer ka Ri Bhoi District nangta u Bah RB Shadap u ba dei u President ka RBDSA, ki nonghikai jong ki skul bapher bapher, ki khynnah skul lem bad kiwei kiwei
