Nongpoh 13 Risaw 2024: Ban nang ailad shuh shuh iaki samla kiba ju sngewtynnad ban ialehkai football bad ban plie iaka lad iaki rangialehkai football jong ka them Ri Bhoi ban ioh mih sha ki lympung ialehkai football bad ruh ban iakhun bad ki nongialehkai kiba don ha kylleng jong ka District RI Bhoi, ki nongialam jong ka RBDSA haka jingialam jong u Bah RB Shadap uba dei u President ryngkat kiwei ki Nongialam jong kane ka Kynhun mynta ka sngi la plie pyrda ia ka 4th Edition Ri Bhoi League kaba la tip kum ka 1st bad 2nd Division Ri Bhoi League 2024, bad ia kane ka lympung ka Ri Bhoi District Sports Association ka la pynlong ha Madan Umdihar Mini Stadium Ri Bhoi District.
Ha Kane ka jingplie pyrda lah wan ban ia don ryngkat lang u Bah Ransom Sutnga kum u kongsan ha ka jingiadon ryngkat lang u Bah Rocky Marwein kum u symbud Kongsan, u Bah RB Shadap President ka RBDSA, U Bah D Ryntathiang Secretary ka RBDSA, u Bah PS Nongrum Vice President ka RBDSA, ki nongkitkam ka RBDSA ki riew paidbah kiba la wan ban sakhi ia kane ka jingialehkai lem bad kiwei kiwei.
Haba ai jingkren na ka liang u Bah Ransom Sutnga kum u Kongsan u lah ong ba ka RBDSA ka dei ka kynhun kaba hakhmat eh kaba ju pynlong iaki lympung ialehkai football ne kiwei kiwei ki jait jingialehkai. bad kane ka la iarap bha iaki sports club jong ki shnong bapher bapher ha Ri Bhoi District ban plielad ba ki lah ban ialehkai ha ki kyrdan ialehkai bapher bapher bad kumjuh ruh ki khynnah ka them Ri Bhoi ki tip ia ka sap kaba ki don. Shuh shuh u la pynpaw ruh da kaba ong ba u kloi ban iatreilang bad ka RBDSA khamtam na ka bynta ban kyntiew ia ki Kam ialehkai hapoh ka District hi baroh kawei. u lah ong ba haka thain Ri Bhoi ki khynnah samla ki kham duna ban ngop haki jingsniew namar ka jingdon jong ki sports club bapher bapher ha kaba ki khynnah samla ki pynmlien bad pynlut por ialade ha ki jinglehkai bapher bapher.
Haba phai sha ka jingialehkai ka long ka ba itynnad bha ha kaba haka 1st division lah ialehkai hapdeng ka Laiphewdiengan SC pyrshah ia 6th MLP Batallion ha kaba baroh kine ki kynhun ki iakhaid bha, kaba lah pynlong ia ki refree ban ai da ka Additional Time bad wat haba lah ai da ka Additional Time ruh kine ki kynhun ki ia khaid bha bad ha ka ba kut baroh artylli kine ki kynhun ki khlem ioh ban thep wat tang shi goal ruh.
Katba ha ka 2nd Division pat, lah ialehkai hapdeng ka Umsohlait Sports Club pyrshah ia Purduwa Sports Club ha kaba ka Umsohlait SC ka lah ioh ban thep 2 kol bad haduh kaba kut jong ka jingialehkai ka Purduwa SC kam shem la lah ban pynphai kylla iaki kol bad ka umsohlait ka la ioh iaka nam jop lyngba kitei ki ar kol
