Nongpoh, 4 Rymphang 2026: Ka seng sainpyrthei United Democratic Party (UDP) hapoh ka Umsning Constituency mynta ka sngi ka la sdang ïa ka lympung jingïalehkai football kaba la tip kum ka Inter Village Football Tournament, da ka thong ban kyntiew ïa ka kam jingïalehkai football bad ban ai ka rynsan ïa ki samla shnong kiba hap hapoh ka Umsning Constituency.
Ban sakhi ïa kane ka jingïalang sdang jong ka lympung, bun ngut ki nongïalam ka UDP ki la wan poi, kynthup ïa u Bah Eddie G Kharbani, President ka Farmers Wing, Ri Bhoi District kum u kongsan; u Bah RB Shadap, President ka RBDSA; u Bah Juban Swer, President ka UDP Youth Wing, Ri Bhoi District; u Bah Biaster Sylliang, President ka UDP Umsning Circle; u Bah FA Syngkli, Secretary ka UDP Umsning Circle; ka Kong E. Lapang, President ka UDP Women’s Wing, Umsning Constituency; lem bad u Rangbah Shnong ka Umdihar, u Bah Romel Lyngdoh, ryngkat bad kiwei kiwei ki nongshah khot sngewbha.
Ha kane ka sngi sdang la pynlong ar tylli ki jingïalehkai. Ha ka jingïakhun kaba nyngkong, ka kynhun Kynjoin Umran ka la iakhun pyrshah ïa ka Syad, ha kaba ka Syad ka la jop da 2–1 kol. Ha ka jingïakhun kaba ar pat, ka Umjarasi ka la iakhun pyrshah ïa ka Saiden, hynrei ka Saiden ka la khur ïa ka jingjop da 2–0 kol.
Ka jingïaid shaphrang jong kane ka Inter Village Football Tournament la khmih lynti ba kan long ka rynsan kaba kyrpang ban wad bad ban pynroi ïa ki sap jingïalehkai football jong ki samla shnong ka Umsning Constituency.
