Shillong, Jymmang 20: Ka samla Rifiness Warjri ka la wanrah burom ia ka jaidbynriew bad ka jylla ban pyndep ia ka jingkiew lum Everest ne Mount Everest u lum thah ba kynjang 8849 mitar ha ka 18 tarik mynta u bnai.

Ka Rifiness Warjri 20 snem ka rta, ka dei kaba pule ha St Anthony’s College bad ka dkhot jong ka 61 Meghalaya Girls Battalion NCC bad ka la shah jied marwei na ka thain shatei lamihngi ban iashim bynta ha ka NCC Mount Everest Expedition 2025.

Ha katei ka kynhun jong ka NCC kaba don 38 ngut, ki la long ki nongjop ha ka ban kiew pyndep ia u Lum thah Everest ha ka 18 tarik mynta u bnai ha ka por 04:45 baje mynstep.

Ka jingkhur ka Rifiness Warjri ia ka jingjop, ka pyni shai ka jingdon ia ka mynsiem jong ka jingiai shah bad ba pyni ruh ia ka jingtbit jong ki samla ka thain shatei lam mihngi.

Kum ban shu pynkynmaw, ki ar ngut ki kynthei ka jylla Meghalaya kiba la kheit ia utei u soh ka jingjop ha ki snem kiba la leit, ki kynthup ia ka Wansuk Myrthong kaba dei ka Police Constable kaba la kiew pyndep ia une u lum thah ha u snem 2013 bad ka Senior GCI Dolyne Kharbhih jongka 61 Meghalaya Girls NCC Battalion kaba na Ri Bhoi District kala kiew pyndep ia une u lum thah ha u snem 2016.

Nalor katei ka jingkiew pyndep ia u Mount Everest, ka Rifiness ha u Nailar 2024 kala kiew pyndep ruh ia u Mount Abi Gamin uba don 7,355-mitar ka jingjrong uba don ha ka jylla Uttarakhand.

Ka Rifiness Warjri ka la pynlut ia ka por kum ka khynnah skul ha ka thain Jylli Shop hashwa ba kan leit sah noh sha Kynton-u-Mon, Laitkor. Napdeng ki 5 ngut shipara, ka Riofiness kadei ka khun kaba 3, jongu Bah Shlurbor Kharmyndai bad ka Kong Diamondsea Warjri kiba dei ki nongai jingkyrshan kiba pura ha ka jingim ka jongka.

Na ka bynta ki paidbah ka thain shatei lammihngi, ka jingjop jong ka Rifiness kala long palat ban ia ka jingjop shimet ka jongka, hynrei kala long ruh kum ka jingkyrmen ia kiwei pat. Ha ka thain kaba ki lad kidei kiba bunsien kiba la shah pynthud na ka jinglong jingman jongka jaka, hynrei ka jingjop ka jongka kala tyngshain bad pynshlur ruh ia kiwei ba kin beh ia thong kaba ki don ha ka jingim, wat lada ka jngai katno katno ruh.

Ka jingsngewtynnad jongka Rifiness ban kiew lum kala sdang naduh ka por ba kala iadonbynta bad ka NCC ha ka por ba ka dang leit skul ha Auxilium Convent Shillong bad dei lyngba ka NCC ba kala sdang ban sngewtynnad bad kiew shaphrang ha kane ka bynta bad kala lam ruh ia ka ban iashimbynta ha ki prokram ki bapher bapher jong ka NCC.

Ha ryngkat ka jingdon ia ka jingthrang ban kiew lum, ka Rifiness kadei ruh kaba tbit ha ka jingialehkai Martial Arts kaba kynthup ia ka Wushu bad Kickboxing bad kala mihkhmat iala ka jylla ha ki lympung iakob ialehkai bapher bapher.

Kine ki jingtbit bad ki jingshemphang ki jongka, kila iarap ban tei ia ka met bad ia ka bor pyrkhat ka jongka bad lam ruh sha ka jingjop ha ka jingkiew ia u lum thah Mount Everest uba la tip ruh kum ka ‘World’s Highest Peak’ ne u lum thah uba jrong tam ha ka pyrthei.