Nongpoh, 8 Iaiong 2025: Ka jinglah bad ka jingiohlad jong ki samla nongialehkai ban ioh iashimbynta haki lympung ialehkai baheh, ka ju pynlong iaka ing bad iaka shnong ka thaw ban don ka jingialumlang khnang ban ai khublei kyrpang iaka lad kaba U Blei u la plielad iaki bad ba ma ki ruh ki la pyndonkam hok iaka sap jong ki.

Hadien ka jingwanphai jong ki rangialehkai ka Skul Myngken Christian Higher Secondary School, Bhoirymbong na Nongbah Paris jong ka ri France, da ka jingsngewburom halor ka jingdon jong ki arngut ki samla shnong kiba dei na ka Shnong Syadrit Ri Bhoi District ban iohlad ban leit sha katei ka Lympung ialehkai football kaba la tip kum ka Indo French 2025 Football Tournament kaba watla ka kynhun kam shem la ioh ban rah iaka nam lahduh hynrei ka la ioh ban bat iaka kyrdan balai na katei ka lympung.

Mynta ka step na ka liang jong ka Dorbar Shnong Syadrit, ka la pynlong iaka jingpynkup burom ia kitei ki arngut ki rangialehkai football kiba kynthup ia u Elister Thangkhiew bad u Semipaia Thangkhiew. Ha kane ka step la iadonlang ki Nongialam Shnong kiba kynthup ia u Bah Nathaniel Nongrum uba dei u Rangbah Shnong, u Bah Heliroy Suting uba dei u Secretary Shnong, u Bah Davidson Marbaniang, ki kmie ki kpajong kitei ki arngut ki samla ialehkai, bad katto katne ki riew rangbah bad ki longkmie jong ka Shnong Syadrit.

Ki nongialam shnong haba kren ha kane ka jingialang pynkupburom ki la pynpaw iaka jingsngewkmen haba ki samla jong ka shnong ki ioh ban mih shakhmat ban pynpaw sha ka pyrthei iaka sap jong ki bad ong ruh ba kane ka jingpynlong iaka jingpynkup burom ka long kum ka jingai mynsiem bad kyntu ruh ia kiwei ba kin bud iaka nuksa jong kine ki arngut ki samla kiba la iohlad ban mih shakhmat da kaba shim nyngkong iaka rai ban kiar na ki jingmlien kiba sniew bad pynlut iaka por ha kabn kilan met bad ialehkai.

Shuh shuh haba ai jingkren ki nongialam shnong ki la pynpaw iaka jingsngewkhia namar ka madan kaba kine ki samla ka shnong ki kilan met ka dei ka madan kaba rit bad kaba donkam shibun ki jingpynbha khnang ba kan nang iarap ia kine ki samla ban lah bha ban kilan met bha kiwei ruh kin iohlad ban kilan met da kaba buh iaki bor sorkar lyngba ka tnat Sports ban phaikhmat kyrpang sha kane ka shnong.