Shillong April 8: Ka Whetstone: A Literary and Artistic Society, Ri Bhoi District, ryngkat bad ka St. Claret Art and Literary Forum, myn haka sngi, 04 tarik u bnai Iaiong 2025 ka la ïoh lad ban leh burom kyrpang ïa u Dr. Kynpham Sing Nongkynrih, u myllung bapura bad nongthohkot bapawnam tam jong ka jylla Meghalaya, Ha kane ka juk ba mynta, uba long ruh u nonghikai bad HoD (English) ka skulbah NEHU, ha Shillong.

Ka Whetstone Society ka leh burom ïa u Dr. Kynpham da kaba ai sngewbha kawei ka dur jong u hi kaba la dro kyrpang da uwei u khynnah samla na Umsning, Ri Bhoi District. La pynphuh pynphieng ïa kane ka jinglehburom da ka jingdon lang u Rev. Fr. Pius Shadap, Episcopal Vicar, Archdiocese of Shillong, kum u kongsan.

U Rev. Fr. Bhakupar Shadap CMF, Dean of Studies, St. Claret Seminary, Umsning, kum u symbud kongsan; ki nonghikai bad ki khynnah skul na ki san tylli ki skul 10+2 ba don hapoh Umsning – St. Michael’s HSS, Balawan College (Hgr. Sec.), Umsning Presbyterian HSS, Nehru Memorial HSS & Ri Bhoi Synod College (Hgr. Sec.); bad kiwei kiwei ki riewrangbah ba la shah khot sngewbha nalor ki phew ngut ki brodar basah ha St. Claret Seminary.

Ka la long ruh ka prokram ka ban sah kynmaw junom ha ka ba u Fr. Pius Shadap, kum u kongsan u la plie paidbah ïa ka Whetstone: A Literary and Artistic Society bad ha ka jingkren jong u, u la ai ka jingïaroh ïa ka jingnohsynñiang jong u Dr. Kynpham sha ka imlang sahlang lyngba ki kot babun tylli kiba u la thoh bad kiba la pynpaw nam ïa u ym tang ha Meghalaya bad ha India, hynrei shabar ri ruh.

U Fr. Pius u la ai ka jingïaroh ruh ïa ka Whetstone Society ba ka la lah ban shim ïa ka sienjam ban pynshlur ïa kiba don sap ban pynriewspah ïa ka imlang sahlang da ki kam thoh bad kiwei kiwei kiba kit jingmut jylliew ban tei ïa ka longbriew manbriew. Kum u symbud kongsan, u Fr. Bhakupar Shadap u la shim ïa ka bynta ban duwai pyneh rngiew bad kyrkhu ïa ka Whetstone Society bad ki dkhot jongka kiba la shah pynskhem ha kane ka sngi hi.

Ha ka jingkren lamphrang, u President ka Whetstone Society, u Bah Lurshai Kharnaïor, u la ïathuh ba ki jingthmu jong ka Whetstone Society ki long ban pynshlur ïa kito kiba don ka sap kyrpang la ka long ha ka thoh ne dro dur kiba kit jingmut jylliew, ban kyntiew ïa kum kine ki jait kam, ban ai jingithuh ïa ki briew kiba tbit ha kum kine ki kam, bad ban long ka jingkieng na ka bynta ban pynïoh ki nongpynmihkot ban pynmih ïa ki kot ba ki thoh. U President u la ïathuh ruh ba ka Whetstone Society kan pynlong prokram na ka por sha ka por ha ki jaka ba la kham long sor ha Ri Bhoi District kum ha Nongpoh, Umden, Byrnihat, Umkadhor, Patharkhmah, Jirang, Umsning, Umbir, Mawhati, Umsohlait, Umroi, Bhoirymbong bad Mawbri.

Ha shuwa ban leh burom kyrpang ïa u Dr. Kynpham, u Bah Suklang Kharthangmaw, u General Secretary ka Whetstone Society, u la pynsngew ïa ka jingkhraw bad jinglongkynsai jong u Dr. Kynpham ha ka kam thoh kot. Haba ai jingkren, u Dr. Kynpham u la pynshai janai halor ka jingmut jong ka literashor bad bad ka jinglong kongsan ka metaphor khamtam ha ka poitri. Ka la long ka jingmyntoi kaba shikatdei ïa baroh ki nongwan sha kane ka prokram. Ki la don ruh ki jingrwai ban pynsngewtynnat ha kane ka sngi bad ki jingïakren hapdeng u Dr. Kynpham bad kiba la wan ïa shimbynta kiba la pan jingmut bad jingsngewthuh halor ka kam thoh kot bad ki kot kiba u la pynmih.