Hadien ka jingkut noh jong ka Samoi treikam jong ka Excutive Committee jong ka Dorbar Shnong ha Umroi Madan ha Ri Bhoi District ka shnong kaba dang hap hapoh ka jingpeit jingkhmih jong u Syiem ka Hima Mylliem.

Ka Dorbar Shnong ka la pynlong iaka jingpynthymmai iaki nongialam da kaba ia jied paidbah kaba la mihkhmat da ki khlieh jong ki longing kiba don ha kane ka shnong.

Nalor kiwei kiwei ki riew rangbah kiba la mih kyrteng haka jingiakhun ban long kum u Rangbah Shnong ka Shnong Umroi Madan, ki paidbah kane ka shnong ki dang shaniah hi ban pynthymmai biang ia u Bah Lamborlang Makri uba dei u Rangbah Shnong barim ban bteng biang sa shisien iaka samoi treikam kaba thymmai bad bteng iaka kam Rangbah Shnong.

Hadien ka jingpyndep ban jied ia u Rangbah Shnong kaba la long haka jingiadonlang jong u Syiem Khynnah u Mansan Manik Syiem, haba kren u Rangbah Shnong u Bah Lamborlang Makri u la pynpaw iaka jingsngewkmen ba ki paidbah ka shnong ki dang shaniah iaka jinglong nongialam jong u hapoh ka shnong bad u la buh pat iaka jingkyrpad ia baroh ki paidbah nongshongshnong ba kin ai ka jingiatreilang bad u kum u Rangbah Shnong khnang ba ka shnong ka thaw kan bit kan biang bad kan long kaba shongsuk shongsain.