Nongpoh, 5 Jylliew, 2025: Kum ka jingiashimbynta haka jingrakhe iaka sngi pynneh mariang lane ka World Environment Day mynta ka snem ka Ophis jong u Block Development Officer na Umsning Block haka jingiatreilang bad ka Grassroot Shillong da kaba pyntreikam iaka Convergent Scheme lane ka jingwanrah iaki kam pynroi da kaba iasynroplang hapdeng ki artylli ki kynhun ka la pynlong iaka jingthung dieng haka shnong Mawtari Thaiang ha Ri Bhoi District, kane ka shnong ka dei kaba don sha ki thain Sonidan.

Ha kane ka jingiatreilang hapdeng ka Grassroot Shillong bad ka Ophis u BDO Umsning, ka Grassroot Shillong ka la pynioh iaki tynrai dieng haduh 25 hajar tynrai katba ka Ophis u BDO Umsning pat ka siew iaka basing ki nongshongshnong lyngba ka Scheme MGREGS bad ka la long ka jingmyntoi kaba khraw ia kane ka shnong Mawtari Thaiang, lah ban kdew ba ka Shnong Mawtari Thaiang ka dei kawei na ki shnong kiba pyntrei bha iaka scheme MGNREGS ha Umsning Block bad ka jingjied jong ka Grassroot Shillong ia kane ka shnong ban wanrah iaki kam pynroi ka long kaba la ai jingmyntoi shibun eh iaka shnong.

Nalor ka jingdon jong ki paidbah nongshongshnong, ha kane ka sngi la iadonlang ruh u MLA ka thain u Bah Charles Marngar, nangta u Bah Andrew Myrthong uba deiu Block Development Office ka Umsning C&RD Block, ka Kong Mayfereen Ryntathiang kaba dei ka President jong ka Grassroot, ka Kong m Nongrum kaba dei ka PO Umsning C&RD Block, u Bah Tolbin Umbah uba dei u Rangbah shnong ka Mawtari Thaiang, u Bah Morningstar Umbah lem bad ki khynnah skul.

Kum ka jingsdang ban thung ia kitei ki 25 hajar tylli ki tynrai dieng, u MLA ryngkat bad baroh kiba la wanpoi ha kane ka sngi ki la pynlong iaka jingthung dieng ha kane ka shnong.